Тываның Баштыңы Владислав Ховалыг Россия Федерациязының көдээ ажыл-агый сайыды Оксана Лут-биле ужурашкан. Малдың халдавырлыг аарыгларынга удур хемчеглер дээн ышкаш Тывада көдээ ажыл-агыйның чидиг айтырыгларын ужуражыышкын үезинде сайгарып чугаалашкан.
Малдың халдавырлыг аарыгларынга удур хемчеглерге акшаландырыышкынны 2024 чылда 330 миллион рубльге чедир азы мурнунда көрдүнүп турганының чартыындан хөй кылдыр көвүдедир дугуржулга чедип алдынганын Владислав Ховалыг массалыг информация чепсектеринге дыңнадып, сайыт Оксана Лут тыва хойнуң эъдиниң амданының чаагайын магадаанын демдеглээн.
Республиканың суггарылга системазын чаартыр септеп, ажыглалын экижидер талазы-биле улуг ажылды чорудуп, мал чеми-биле республика боду хандыртынар баазаны тургузуп эгелээнин, суггаттыг шөлдерниң хемчээлин 2030 чылга чедир 45 муң гага чедир улгаттырар сорулга салдынганын Владислав Ховалыг айыткаш, Тывага амгы үениң бедик бүдүрүкчүлүг суггарылга системазын үндезини-биле тургузар дээш, республикада суггарылга системаларының хыналдазын чорудуп, амгы байдалын тодарадыр ажылды кылырын Оксана Лут саналдаанын ол дыңнаткан.
Тываның социал-экономиктиг хөгжүлдезиниң хууда программазын 2030 чылга чедир уламчылаар шиитпирни РФ-тиң Президентизи хүлээп алган ачызында республиканың көдээ ажыл-агыйынга чугула төлевилелдерни боттандырар аргалар барын Владислав Ховалыг демдеглээн.
Ш. МОҢГУШ белеткээн.
"Шын" №61 2024 чылдың август 14
