Кызылдыӊ 38 харлыг чурттакчызы алимент төлевейн турганындан өре-ширези көвүдээн. Суд приставтарындан чаштып дезип тургаш, туттурган. Чыглы берген өрезин төледир дээш, 80 шак иштинде албан ажылдаар кылдыр шиитпирлээн.
Суд приставтары ону "Автоколонна 17" деп организацияга быжыглаан. Амгы үеде ол транспорт септеп, автобустар чуп ажылдап турар.
Бо чылдыӊ 10 ай дургузунда суд приставтары 400 ажыг күүселде херектеринде буруулуг кижилерни албадап ажылдадып тургаш, өрезин төлеткен.
— Акша-хөреӊги шилчидер хүлээлгезин күүседип, өрезин дүрген төлептерин шак мындыг хемчеглер угаадып турар. Өреӊер бар болза, дуглаар акша-хөреӊгиден тып, ону дарый төлээрин сүмелээр-дир бис. Чаӊгыс-даа кижиниӊ өрези эскет чок билдирбейн баар деп чүве турбас дээрзин херек кырында практика көргүзүп турар – деп, Кызыл хоорайныӊ суд пристав-күүсекчизи Д. Куулар тайылбырлаан.
РФ-тиӊ Федералдыг суд пристав албаныныӊ Тывада эрегелелиниӊ медээлеринден.
“Шын” №92 2024 чылдың ноябрь 30
