Тываның Кадык камгалал яамызынга эмнелге албан черлериниң төлээлери-биле чидиг респираторлуг аарыглар болгаш ээлчеглиг грипп сезонунуң көдүрлүр үезинге кайы хире беленин сайгарып чугаалашкан.
План ёзугаар чурттакчы чоннуң 60 хуузу гриппке удур тарыткан. Азы өскээр чугаалаарга, 202 муң 539 кижи тарылганы алган.
Бичии уругларга, сааттыг херээженнерге, улуг назылыгларга, хуусаалыг шериг албанынче кыйгыртканнарга, студентилерге, кадык камгалал, өөредилге, ачы-дуза чедирер адырларның ажылдакчыларынга федералдыг бюджеттен акшаландырыышкын-биле төлевир чок тарылганы чорудуп турар. Гриппке удур тарылга кылыр эмнер эмнелге албан черлеринде тарылга планын күүседиринге четчири-биле келген. Сөөлгү партия сентябрь 19-та республика бюджединиң акшаландырыышкыны-биле 23 муң 850 доза келген.
Эрткен неделяның түңнелдери-биле, ээлчеглиг гриппке удур 58 муң 36 кижи тарыткан. Оларның иштинде 6 муң 689-у бичии уруглар.
Быжыглаттынган поликлиниказынга баргаш азы ажылдаар черинче тарылга кылыр бригаданы чалапкаш, гриппке удур тарыдып ап болур. Баш удур санаашкын-биле эпидемиологтуг сезон үезинде аарыг кижилер саны 33 муң 754 чедип болур деп санап турар. Аңаа дүүштүр эмнерни, эмнелгелерде оруннар санын, дезинфекция херекселдерин, хууда камгалал херекселдерин чогууру-биле белеткээн. Ниитизи-биле 205, ооң иштинде бичии уругларга 120 орунну салырын планнаан.
Кадык камгалал яамызы ээлчеглиг гриппке болгаш Covid-19-ка удур тарыдып алырын кыйгырып, чурттакчы чонга быжыг кадыкшылды күзээн.
Бистиң корр.
“Шын” №74 2024 чылдың сентябрь 28