Алдарлыг режисеернуң адын тывыскан.

Бөгүн, октябрь 16-да, Кызыл-Мажалыкка байырлыг байдалга Россияның алдарлыг артизи, Тываның улустуң артизи Алексей Ооржактың чурттап чораан кудумчузун ооң ады-биле эде адаан.

Алдарлыг режиссернуң чырык адынга тураскааткан хемчегге кожууннуң удуртулгазы, суурнуң чурттакчылары, режиссернуң дөргүл-төрели, Тываның Национал болгаш кожууннуң хөгжүм-шии театрларының хоочуннары, артистер чыглып киришкен.
Барыын-Хемчик кожууннуң чагырыкчызы Алексей Маркс-оол, Ак-Довурак хоорайның Төлээлекчилер хуралының даргазы Анай-Хаак Буянды сөс алгаш, Тываның Национал театрының удуртулгазы, режиссерлары, артистеринге, режиссернуң дөргүл-төрелдеринге четтиргенин илереткеш, кудумчуну ылап-ла кожууннуң төлептиг оглунуң ады-биле адап турарынга чоргаарланып турарын демдеглээннер. Чагырыкчы кудумчуга хамаарышкан чаартылгалыг ажылдар чорударының дугайында планнары-биле үлешкен.
Национал театрның директору Начын Шалык кожууннуң чагырга даргазы база режиссернуң дөргүл-төрелдери-биле сумелешкеш, чаа адаттынган кудумчуга тураскаал тургузар бодалды чугаалаан. “Ылаңгыя ырак-чоокта кожууннарже, суурларже гастрольдап чораан артистер эрткеш-дүшкеш, бо кудумчуга доктаап, тураскаал чанынга улуг режиссерну утпайн, сактып чоруур болзун дээш”- деп, директор демдеглээн.
Алексей Ооржак-биле хөй чылдарда кады ажылдап чораан чаңгыс чер чуртуу, Национал театрның режиссеру, Тываның алдарлыг артизи Орлан Монгуш: “Шак мындыг хемчегге киржири девиденчиг-даа, сүрээденчиг-даа чүве-дир. Ындыг-даа болза, билдингир режиссер-биле чаңгыс хемниң суун кады ижип өскен, чаңгыс школаже барып турганымга чоргаарланмас аргам чок”- деп чугаалаан.
“Бөгүнгү болуушкун Алексей Кара-ооловичиниң чырык адынга тураскааткан улуг төлевилелдерниң эгезин салган боор деп идегеп тур бис”- деп, “Хемчик” ыры-танцы ансамблиниң директору Юлиана Ондар чугаалаан. Ийи театрның артистери, хоочуннары болгаш кожууннуң культура эргелелиниң ажылдакчылары ажык дээр адаанга кыска оюн-тоглаалыг концертти организастаан.
Хөйге билдингир режиссер Алексей Ооржак чораан болза, 70 харлаар турган. Тываның В. Көк-оол аттыг Национал театры 87 дугаар театр сезонун алдарлыг режиссернуң төрүттүнген кожуунунга ажыткан утказы-даа ол. Октябрь 10-дан тура Барыын-Хемчик кожууннуң национал театрының сценазынга алдарлыг режиссернуң тургускан шиилериниң көрүлделери эрткилээн. Шии бүрүзү аншлаг болган.
Бөгүн, октябрь 16-да, Алексей Ооржактың эгелеп кааш, кылып четтикпээн ажылының бирээзи “Модэ. Элдиң эгези” шииниң премьеразы-биле Национал театр Барыын-Хемчик кожуунга гастрольдарын ынчаар доозуп турар.

Бистиң корр.