Июнь 3-те Кызыл хоорайның Тиилелге шөлүнден тускай шериг операциязынче автомашиналарны болгаш ГАЗ-66-да быжыглаан мобильдиг чунар-бажыңны чоруткан.
Демир-оруктуг черге чедир автомашиналарны мунуп четкеш, улаштыр чүък чүдүрер поезд-биле чорудар. Беш техниканың ийизин 55-ки гвардейжи мото-адыгжы (даг) бригада, база бир ийизин – "УАЗ СГР" маркалыг автомашиналарны «Тывахарылзааинформ» АН дузалаан. "ГАЗ-66" маркалыг мобильдиг чунар-бажың Таңды кожууннуң чурттакчыларының деткимчези-дир.
«Бистиң организациявыс бөгүн ТШО-да киржип турар чаңгыс чер чурттугларывысче дузаламчыны чорудуп турары бо. Ооң мурнунда-даа харылзаа тударынга ажыглаар тускай дериг-херекселдерни чорудуп турдувус. Кышкы үеде чылыг хептер-биле-даа дузалап турдувус. Чоокта чаа коллектив акша чыггаш, "УАЗ СГР" автомашинаны шилээш саттывыс. Ук машинаның эки чүвези – ол кончуг күштүг, каяа-даа халдып турар. Чорудар бетинде организацияның специалистери чаңгыс-даа үрелик чер чок кылдыр катап-катап хынап, чедер-четпестерин чаарткан» – деп, «Тывахарылзааинформ» АН-ның чиңгине директору Сылдыс Хертек демдеглээн.
Бо удаада автомашиналардан аңгыда, мобильдиг чунар-бажың база чорупкан. Аңаа хамаарыштыр ТР-ниң кадыкшылга төвүнүң улуг эмчизи Айдың Серен-оодуң тайылбыры-биле алырга, Таңды кожууннуң чагырга чериниң, сайгарлыкчыларның болгаш бөдүүн чоннуң киржилгези-биле мобильдиг чунар-бажыңны ийи ай дургузунда кылган.
Улусчу фронтунуң регионалдыг күүсекчи комитединиң удуртукчузу Саима Далчинниң медеглээни-биле алырга, РЖД компаниязы-биле кады ажылдажылганың ачызында гуманитарлыг дузаны удаа-дараа чорудар. Болганчок-ла дуза кадыксаан хамаатылар канчаар чорудар аайын тыппайн баар болгай. Дараазында чүъктү июнь төнчүзүнде чорудары планда көрдүнген. ТШО-да чаңгыс чер чурттугларывыска дуза кадар күзелдиглер аңаа киржип болур.
ТМГ-ниң медээлеринден А. ОНДАР белеткээн.
Чуруктарны интернет четкизинден алган.
«Шын» №41 2024 чылдың июнь 5
