Аъттарывыс баглаашта манап тур.
Ам-на че, мунупкаш, хаптаалам.
Шак дуу ол дагларны ажаалам,
Сарыг узун ховуга чарыштыраал.
Бараалам, чоруулам,шымда!
Бачым салгын хадый каап үдезин.
Калбак делгем хемивис эриинге
Халдып четкеш, эштип ап көрээли.
* * *
Адырам, адырам, адырам!
Алдыы шыкта малдарны хараалы.
Аалывыс чанында тейге бис
Аян ырны ырлап каап ораалы.
Бараалам, бараалам, бараалам!
Бараандан харап каап ораалам.
Сеткилдерниң шагдагы дүвүрелин
Чеже соп, хөөрежип ораалам.
Халдып ор, эргимим, халдып ор!
Кара даглар эдээнге доктаава,
Хайыралыг эжиң сени манаан боор,
Караңнады халдып ор, доктаава!
* * *
Ынакшылды ханы билгеш, ырлапкан мен,
Ынчалза-даа чүрээм ыстаар, кандаай чүвел?
Сеткилимни кара күштер аспактаанзыг,
Сергек чаңым бүргег дүне, кандаай чүвел?
* * *
Өөрүшкүм кударалым мени кагбас, кады чорлар.
Өөрлерим үдеп тургаш, кудараан мен.
Өңнүүм аалдап чедип келген, өөрээн мен.
Өскүс эжин олар кагбаан, деткип чорлар.
∕ Эрес-оол ХАЯҢ.
Чурукту интернеттен алган: yandex.ru/images/sea...