Кадыг коммунал боктарны болбаазырадып аштаар объектини тургузар талазы-биле инвестиция төлевилелин Тыва Республиканың Кызыл кожууннуң девискээринге боттандырар талазы-биле белеткел ажылдары ам дээрезинде «орук картазының» байдалында чоруп турар.
Российжи экологтуг операторнуң чиңгине директору Денис Буцаев-биле Тываның Баштыңы Владислав Ховалыг ужурашкан. Кадыг коммунал боктарны үндүр сөөртүрүнге тускай техниканың чедишпези, боктарны чыып болбаазырадырының шупту экологтуг негелделери ёзугаар туткан полигоннуң Тывада чогу база өске-даа чидиг айтырыгларны Владислав Ховалыг биле Денис Буцаев ажылчын ужуражыышкын үезинде сайгарып чугаалашканнар.
«Бок сөөртүрүнге тускай техника-биле регион 78 хуу хандыртынган, 103 санныг техниканы садып алыр чагыгны республика киирген. Боктар чыыр тускай черлер база чедишпес, 1110 ындыг чер херек, херек черлерниң 68 хуу хирези туттунмаан. Бокту болбаазырадып арыглаар талазы-биле берге байдалдан үнүп алыр дээш, регион бар-ла аргаларны ажыглап турар. Бокту чыып болбаазырадырының инфраструктуразын боттандырары орук картазының идепкейлиг деңнелинде-дир» — деп, Денис Буцаев демдеглээн.
Кызыл кожууннуң девискээринге кадыг коммунал боктарны болбаазырадып аштаар объектини тургузарының инвестиция төлевилелиниң төлевилел-смета документациязы Росхереглелхайгаарал албанының Тывада эргелелиниң санитар-эпидемиологтуг экспертизазының эки деп түңнелин алган, ону күрүне экспертизазынче чоруткан. Күрүне экспертизазының деткимче түңнелдерин алган соонда, кадыг коммунал боктарны болбаазырадып аштаар объектини тударынга херек субсидияларны алыры-биле республика Россия Федерациязының Бойдус яамызының шилилге конкурузун эртер ужурлуг.
«Тыва Республиканың девискээринге кадыг коммунал боктарны болбаазырадырының айтырыгларының талазы-биле ведомстволар аразында чаа тургускан ажылчын бөлүктү боду баштаарын Денис Петрович чугаалады. Бо айтырыгны аайлап баштаарынга Российжи экологтуг операторнуң деткимчези биске кончуг чугула» — деп, ужуражыышкын соонда бодунуң телеграм-каналынга Тываның Баштыңы бижээн.
Кадыг коммунал боктарны болбаазырадырының регион оператору «Транспорт ачы-дузазы болгаш төлевилел» күрүнениң унитарлыг бүдүрүлгезиниң ажыглалында амгы үеде 29 тускай техника бар. Оларның бежин бо чылда садып алган. 2024 чылдың эрткен 9 айларында 48 муң тонна кадыг коммунал боктарны регионда оператор үндүр сөөрткен.
Ш. МОҢГУШ белеткээн.
Чурукту интернет четкизинден алган.
“Шын” №81 2024 чылдың октябрь 23