Тускай шериг операциязынга бирги хонуундан эгелээш киржип келген “Эрес-дидим чорук дээш” хөрек демдээниң эдилекчизи Кежик Намчын шыңгыы шилилгени эрткеш, “Тываның маадырлары” программаның 30 киржикчизиниң санынче кирген.
Кежик Намчын 2014 чылдан эгелеп Кызылда 55115 дугаарлыг шериг кезээ-биле керээни чарган. Бир чыл болганда хайгыыл салбырының командири апарган.
“Бичиимден тура Ада-чуртун камгалаар, шеригжи кижи болуксаар турган мен. Чадаананың бир дугаар школазын чедиишкинниг дооскаш, улаштыр Кызылдың экономика болгаш эрге-хоойлу техникумунуң хоойлу-дүрүм эртеминиң талазын шиңгээткеш, дипломну алдым. Уссурийскиге шериг албан хүлээлгезин эртип тургаш, ук угланыышкынга ажылдаар күзелим улам күштелген. Ынчангаш 2014 чылда 55-ки даг-адыгжы гвардейжи бригада-биле керээни чардым” — деп, Кежик Намчын чугаалаан.
Тускай шериг операциязынга ол хайгыылчы взводту удуртуп турган. Оларның турган пунктузунче халдаашкын болган. Дайзыннарның артиллериязының күштүг боолаашкынын шыдажып эртипкеннер. Командазындан чаңгыс-даа кижи аңаа бажын салбаан, ынчалза-даа командири Кежик Намчын аар балыгланган.
“Изиг-изиг тулчуушкунну ажып эртип шыдапкан бис. Каш дайынчы өөрлерим-биле кемдээшкиннерлиг болдувус. Ынчалза-даа чаңгыс-даа кижи амы-тынындан чарылбааны улуг аас-кежик болган. Ооң түңнелинде үш айның дургузунда Санкт-Петербургтуң эмнелгезинге долу эмнээшкинни эр- тим” — деп, Кежик Намчын демдеглээн.
Красный Лиман чоогунга тулчуушкунга чаныш-сыныш чок маадырлыг чоруу дээш Президентиниң чарлыы езугаар “Эрес-дидим чорук дээш” деп хөрек демдээ-биле сержант Кежик Намчын шаңнаткан. Ол амгы үеде хөй-ниити ажылдарында киржип чоруур. Ылаңгыя школаларга патриотчу “Эрес-дидим чорук” кичээлдеринге идепкейлиг киришкен. Ол 625 кижи аразындан шыңгыы шилилгени эрткеш, «Тываның маадырлары» деп регионалдыг программаның киржикчизи болган.
“Тываның Чазааның дайынчыларга көрдүнген онза программазының дугайында интернет четкизинден көрүп каан мен. Документилерим чыггаш, киржир күзелим илереттим. Эртер чадалар көвей болду: анкета долдурар, хөй-ле хыналдалар болгаш чугаалажылга эртер дээш оон-даа өске. Ылаңгыя психологтуг байдалче улуг кичээнгейни салыр чорду. Киржикчилер база хөй болган. Шилилигени ажып эртип алганымга дыка өөрүүр-дүр мен. Ам чүгле эки белеткенири арткан. “Тываның маадырлары” программага киржип, төрээн республикамның хөгжүлдезинге үлүг-хуумну киириксеп тур мен” – деп, Кежик Намчын сорулгалары-биле үлешкен.
“Тываның маадырлары” деп төлевилелди президентиниң «Маадырларның үези» деп программазынга дөмейлештир кылган. Өөредилге 2025 чылдың сентябрь 2-ден 2026 чылдың июнь 16-га чедер. Программаның киржикчилери түңнел квалификация ажылын камгалаар. Ооң түңнелинде Россияның Президентизиниң чанында күрүне албанының болгаш улусчу ажыл-агыйлар академиязының болгаш ТывКУ-нуң профессионал белеткелиниң ийи дипломун алырлар.
Олча СААЯ.
Чурукту Кежик НАМЧЫННЫҢ архивинден алган.
“Шын” №27 2025 чылдың июль 17
