Май 17-де Дээди Хуралдың хуралдаар залынга тускай шериг операциязынга киржип тургаш, маадырлыы-биле амы-тынындан чарылган шериглерниң шаңналдарын чоок кижилеринге тыпсыр ёзулал болган. Аңаа Дээди Хуралдың депутаттары, Тыва Чазактың төлээлери дээш оон-даа өскелер киришкен.
Дээди Хуралдың Даргазы Каң-оол Даваа чыылганнарның кажыыдалын үлешкен: “ТШО үезинде амы-тынындан чарылган маадырларывыстың кады төрээннеринге, төрелдеринге, ада-иезинге, кады чурттаан эштеринге, уруг-дарыынга чүрээвистиң ханызындан кажыыдалды болгаш сагыш човаашкынны илередип тур бис. Олар бистиң база улуг чурттуң келир үези дээш эң-не үнелиг амы-тынын бергеннер. Шериг хүлээлгезин төлептии-биле күүсеткен Тывавыстың төлептиг оолдары Россияның болгаш Тываның хөй омак-сөөктүг чонунга кезээ мөңгеде сактыышкын болуп артар. Оларның чоок кижилериниң сагыш-сеткилин оожургадыр сөстер тывары берге-дир. Ынчалза-даа оларның амы-тыны хилис барбас, тиилелге бистии болур. Тыва чуртувустуң оолдарының маадырлыг чоруу Ада-чурттуң Улуг дайынының эки турачылары дег, келир салгалдарга үлегер-чижек. Оларның дугайында өлүм чок сактыышкын бистиң чүректеривиске кезээ мөңгеде артар”.
Бо маадырлар өзүп олурар салгалдарга үлегер-чижек болур дээрзин Дээди Хуралдың депутады Эрес Хуурак демдеглээн: “Бөгүн Тываның Баштыңының, Дээди Хуралдың Даргазының даалгазы база Россия Федерациязының Президентизи, кол командылакчы Владимир Путинниң чарлыы-биле маадырлыы-биле амы-тынындан чарылган оолдарның өг-бүлелеринге оларның эрес-дидим чоруктуң орденнерин байырлыг байдалга тывыстывыс. Сагыш-сеткилге кончуг-даа берге хемчег болду. Ынчалза-даа бис оларга чоргаарланыр ужурлуг бис. Хуусаалыг шериг албанын-даа эртип турар, аңаа белеткенип-даа турар оолдарга, ниитизи-биле өзүп олурар салгалдарга үлегер-чижек, бүгү тыва чонга улуг чоргаарал болур”
Сактыышкынның минутазын чарлаан соонда, эрес-дидим чоруктуң орденнерин тывыскан. Тускай шериг операциязынга бажын салган маадырлар боттарының амы-тыны-биле тиилелгени чоокшулаткан дээрзин биче сержант Адыгжы Ооржактың авазы Елена Ооржак демдеглээн: “Хүндүлүг чаңгыс чер чурттугларым! Бөгүн бис Украинага амы-тынындан чарылган эрес-дидим оолдарывыска сактыышкын кылып чыглып келдивис. Оолдарывыстың чок болганы биске, чоок кижилеринге, төрелдеринге улуг чидириг болган. Ынчалза-даа бистиң оолдарывыс боттарының амы-тыны-биле тиилелгени чоокшулаткан”.
Дайынчы Игорь Ооржактың кады төрээни Елена Ооржак оглу-биле кады акызының шаңналын ап чедип келген. “Мээң даайым Игорь Ооржак ёзулуг патриотчу. Бистиң чуртувусту камгалап тургаш маадырлыы-биле өлген. Маадырлыг чоруктуң үлегерин көргүскен даайым бистиң чүректеривиске кезээ мөңгеде артар” – деп, маадырның соон салгаан кадет корпуста өөренип турар келир үениң дайынчызы болур чээни чугаалаан.
55-ки гвардейжи мото-адыгжы (даг) бригаданың дайынчызы, лейтенант, офицер Аяс Дамдын-оолович Лопсанның өөнүң ишти Елена Лопсан дайынчының дугайында улуг хараадал-биле чугаалаан: “Ажы-төлүм ачазы кончуг дидим, шыңгыы, чүүден-даа кортпас, бурунгаар көрүштүг чораан. Үш ажы-төлүвүстүң улуу Кызылдың президентиниң кадет училищезинде өөренип турар. Хеймерегивисти көрүп безин четтикпээни кончуг харааданчыг-дыр. Ол ам чаа-ла 9 айлыг. Ынчаар-ла чанып шыдавайн барды”.
Чыжыргана СААЯ.
Буян ООРЖАКТЫҢ тырттырган чуруктары.
“Шын” №36 2024 чылдың май 18
