Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Алтай крайже ажылчын үнүүшкүнүнүң үезинде «Веселоярск» эрттирилге черинге чедип, кызыгаар чоогунда регионнуң кызыгаар чериниң эрттирилге пунктуларының чаагайжыдылгазының чидиг айтырыгларының талазы-биле чөвүлел хуралды аңаа эрттирип, кызыгаар чоогунда девискээрлерге чогуур инфраструктураны тургузарын чугаалашкан.
Алтай крайның девискээринде күрүне кызыгаарын кежилдир 12 эрттирилге пунктузу ажылдап турар. Казахстан Республика-биле регионнуң күрүне кызыгаарының ыракшылы 840 ажыг километр, хамаатыларның болгаш транспорт хөлгезиниң аргыжылгазының кол оруу «Кулунда», «Веселоярск» болгаш «Михайловка» эрттирилге черлерин таварыштыр эрткен.
«Барыын чурттарның хоойлу-дүрүмге дүүшпес санкциялары Россия Федерациязының найыралзырак кожа-хелбээ чурттар-биле кызыгаар чоогунуң кады ажылдажылгазын калбарткан — деп, Анатолий Серышев демдеглээн. – Мооң-биле холбаштыр кызыгаар контролюн эртериниң дүргениниң база шынарының талазы-биле сорулгаларны системалыг шиитпирлээр ужурлуг бис».
Чөвүлел хуралга Алтай крайның губернатору Виктор Томенко, Новосибирскиде Роскызыгаар объектилериниң тудуунуң болгаш ажыглалының талазы-биле дирекцияның директору Александр Сирчук, Айыыл чок чоруктуң федералдыг албанының Алтай крайда кызыгаар эргелелиниң начальниги Андрей Кузнецов, эрге-чагырганың регион болгаш албан черлериниң төлээлери киришкен.
Мооң мурнунда күрүне баштыңының бүрүн эргелиг төлээзи Омск областа «Одесское», Новосибирск областа «Павловка» эрттирилге черлеринге чедип, чөвүлел хуралдарны эрттирген. Ындыг чергелиг ажылдар моон-даа соңгаар уламчылар.
Россияның Президентизиниң Сибирь федералдыг округта бүрүн эргелиг төлээзиниң албан ёзулуг сайтызындан.
