Март 17-де Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев ажыл албан аайы-биле Кемерово облазы – Кузбасска чедип, регионнуң социал болгаш үлетпүр адырының мурнакчы объектилеринге четкен.
Россия Федерациязының камгалал сайыдының оралакчызы – статс-секретарь, «Ада-чурт камгалакчылары» күрүне фондузунуң даргазы Анна Цивилева, Россияның энергетика сайыды Сергей Цивилев, Кузбасстың губернатору Илья Середюк олар-биле кады бүрүн эргелиг төлээ Юрга хоорайның эмнелге баазазында шериг албанныгларны эмнеп база реабилизастаар хөй талалыг эмнээшкин госпиталының ажыдыышкынынга киришкен. «Кузбасстың кадык камгалалының хөгжүлдези» күрүне программазы-биле эмнелгени бүрүнү-биле чаартып, медицина дериг-херекселдери-биле дерээн.
Бүрүнү-биле чаарттынган 7,2 муң дөрбелчин метр ажыг шөлдүг үш каът эмнелге бажыңында хирургия, терапия, халдавырлыг аарыглар, неврология, функционалдыг болгаш херелдиг диагностика салбырларының, эндоскопия шинчилелдериниң аңгы-аңгы угланыышкынныг 150 орунун салган. Эмнелгениң амбулаторлуг салбыры бир ээлчегде 60 кижини хүлээр. Реабилитация, физиотерапия салбырын дериг-херекселдер-биле четчелээн.
Кемерово хоорайга Анатолий Серышев, Сергей Цивилев, Анна Цивилева, Илья Середюктуң киржилгези-биле бедик технологиялыг протез төвүнүң бирги ээриилин киир быжыглаан. Аарыг кижилерге дыка эптиг, ажыглалы улуг протезтерни аңаа кылыр. Кузбасстың реабилитация төвүнүң баазазында объектиниң тудуу инвесторнуң акша-хөреңгизи-биле туттунуп турар. Ниитизи-биле Кемерово облазының Кемерово, Белово база Новокузнецк хоорайларга үш реабилитация төвүн тудары планнаттынган. Кузбасстың найысылалынга 98 оруннуг, интенсивтиг терапия болгаш реанимация салбырларлыг, бассейн, спа-зона, дустуг өрээлдерлиг объект турар. Тудугнуң ниити шөлү 16 муң дөрбелчин метрден ажа бээр.
Кадык камгалалының чаа объектилерин тудары болгаш амгы эмнелгелерни чаартыры – күрүне Баштыңы Владимир Путинниң мурнады хөгжүдер угланыышкыннарынга хамааржыр. Кузбасста ол айтырыгларны депшилгелиг шиитпирлеп турар: бирги дуза албан черлерин септеп, фельдшер-акушер пунктуларын тургузуп, амгы үениң тускайжыттынган эмнелгелерин, реабилитация төптерин тудуп турар. Бо күжениишкиннер регионнуң шупту чурттакчыларынга кончуг чугула деп, Анатолий Серышев демдеглээн. Ооң-биле чергелештир, хамаатыларның тускай бөлүү – Россияның бот-тускайлаң хөгжүп сайзыраар эргезин камгалап турар тускай шериг операциязының киржикчилери оолдар база бар. «Тускай шериг операциязының үезинде Төрээн чуртун камгалап чораан кижилер катап тургустунуп, чаңчылчаан амыдыралынче эглип кээр кылдыр, эки байдалдарны тургузар хүлээлгелиг бис» — деп, ол онзалап демдеглээн.
Бүрүн эргелиг төлээ 2024 чылдың ноябрьда Кемерово хоорайда ажыттынган «Газпром Нефть» компанияның чаа одаар чүүл терминалынга четкен. Кузбасстың энергетика адырында сөөлгү чылдарда боттандырган эң улуг инвестиция төлевилелдериниң бирээзи ол болур. Ийи чыл ишти туткан бо термал ышкаш техниктиг дериттинген ындыг чер Уралдан бээрлээрге чок. Объектиниң дериг-херекселиниң 98 хуузун Россияга бүдүрген. Комплекс кывар чүүл кудар станциялар четкизин база мөөң садып алыкчыларның хереглелин хандырар стратегтиг курлавырны тургузур.
Күрүне Баштыңының бүрүн эргелиг төлээзи Кемерово облазы – Кузбасска ажыл албынының аайы-биле хөмүр-даш үлетпүрүнүң талазы-биле хуралга киришкен. РФ-тиң энергетика сайыды Сергей Цивилев, Кузбасстың губернатору Илья Середюк болгаш хөмүр тывыш компанияларының төлээлери сайгарылгага киришкен.
Кузбасс – чуртта хөмүр-даш тывыжының чартыын хандырып турар хөмүр үлетпүрүнүң төвү, ук адырда регионнуң 100 муң хире чурттакчылары ажылдап турарын бүрүн эргелиг төлээ онзалап демдеглээн. «Адыр аңгы-аңгы үелерни эрткен, ооң иштинде хөмүр компаниялары курлавырларны чыып алгаш, регионнуң шупту чурттакчыларынга ужур-дузалыг хөгжүлде төлевилелдерин боттандырып турган. Бөгүн эң-не таарымчалыг шиитпирни тып, берге байдалдан үнер дизе, төнчү түңнелден хамааржыр угланыышкыннарга шупту харыысалгалыг кижилерни хаара тудуп, кады ажылдаары кончуг чугула» - деп, Анатолий Серышев демдеглээн.