Бөгүн Новосибирск хоорайга Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Сибирьниң каайлы эргелелиниң начальниги Александр Ястребов-биле ажылчын ужуражылганы эрттирген.
Ужуражылганың кол темазы – округтуң регионнарының каайлы эргелелдериниң 2024 чылда ажылының түңнелдери база 2025 чылдың сорулгалары болган. Делегей чергелиг садыглажылганы дүрген хөгжүдери, корум-чурум камгалаар угланыышкында чедип алган көргүзүглер, ол ышкаш Сибирьниң бүдүрүлгелериниң даштыкы экономиктиг ажыл-чорудулгазын бөдүүнчүдеринче угланган информастыг технологияларны сайзыраңгайжыдары дээн ышкаш айтырыгларны сайгарган.
Анатолий Серышев Сибирьниң каайлы эргелелиниң эрткен чылда ажыл-чорудулгазының түңнелдеринге эки үнелелди берген. Бүрүн эргелиг төлээ ведомствонуң ажылы «эки болгаш дээштиг» болган деп чугаалаан. Александр Ястребов Россияның Президентизиниң болгаш чурттуң Чазааның Россияның Федералдыг каайлы албанының мурнунга салган сорулгалары планнаашкынның кол угланыышкыннары болганы деп демдеглээн. Каайлы операцияларын дүрген кылыры, төлевирлерни үе-шаанда болгаш долузу-биле төлээри, ол ышкаш кем-херек үүлгедиишкиннери болгаш административтиг чурум үрээшкиннери-биле демиселдиң үре-түңнелдии — эң чугула угланыышкыннар санында.
Сибирьниң Каайлы эргелелиниң удуртукчузунуң чугаазы-биле алырга, Сибирь федералдыг округтуң бүгү декларация пакединиң 90 ажыг хуузу амгы үеде 4 шак дургузунда үндүрүп турар, сөөлгү үш чылдың дургузунда Сибирьниң электроннуг каайлызының кол көргүзүү болуп хевээр арткан. Эрткен чылын «айыыл чок» партияларны үндүрери ортумаа-биле чартык шактан эвээш үени чарып турган. 2024 чылдың июньда ыяш материалдарын хала чокка үндүрер технологияны киирген. Сибирьниң Каайлы эргелели ону тургузуп, шенээринге дорт киришкен.
Федералдыг арга-арыг ажыл-агыйы база ведомстволар аразында электроннуг кады ажылдажылганың ачызында даштыкыже үндүр сөөртүр ыяш материалдарын хынаар чедимчелиг ажылды тургузуп алган. А РФ-тиң Чазааның талазындан алган хемчеглерниң түңнелинде Сибирь регионунда каайлы-төлевирин чурумчудар ажылдар-биле анаа ыяшты үндүр сөөртүрүнүң орнунга, болбаазыраткан ыяштарны үндүр садарын 97 хуу чедирген. Каайлы албанының корум-чурум камгалаар кезектери ыяшты хоойлу езугаар үндүр сөөртүрүнче онза кичээнгейни салган: 2024 чылда ыяш үндүр сөөртүр шугумда 115 кеземче херээн оттурган, ооң иштинде ыяш-биле контрабандалыг 112 кеземче херээн, организастыг кем-херек үүлгедикчилеринге онааштыр 11 кеземче херээн оттурган.
Оон аңгыда, Сибирьниң каайлы органнары хоойлуга удур эргилдеден 480 ажыг килограмм хоруглуг болгаш хыналдалыг бүдүмелдерни хавырып, 90 муң ажыг санныг контрафакт продукцияның шимчээшкинин соксаткан, иштики рынокта албан кылдырар демдээ чок 1,5 сая ажыг барааннарны, ооң иштинде таакпы болгаш арага продукциязын илереткен.
Оон аңгыда, ведомствонуң информастыг айыыл чок ажылын хандырарын база чугаалашкан. Александр Ястребов ада-чурттуң программа хандырылгазын киирер системалыг хемчеглер дугайында бүрүн эргелиг төлээге илеткээн. «Амгы үеде Россияның мурнунга тургустунуп келген бергелерни барымдаалап, даштыкы чурагайлыг барааннарны дүрген солуур дээш бүгү аргаларны ажыглаары чугула» — деп, Анатолий Серышев онзалап демдеглээн.
Сибирьниң регионнарында аъш-чемниң айыыл чок чоруу — сайгарылгалыг аңгы айтырыг болган. Сибирьниң Каайлы албанының удуртукчузунуң чугаазы-биле алырга, найырал чок чурттар санкцияларны салза-даа, 2024 чылдың төнчүзүнге чедир округта аъш-чем импорту 30 ажыг хуу өскен. Евразийжи экономиктиг эвилел чурттарындан сөөртүлгениң өскенинден база найыралдыг даштыкы экономиктиг партнерлар-биле чаа садыглажылга-логистика схемаларын тургусканындан ол чедип алдынган. Сибирь регионнары-биле даштыкыда партнер чурттарның аразында садыг-саарылганың хемчээлин улгаттырганы Сибирьниң экономиказынга улуг үлүг-хуузун киирип турар.
Бүрүн эргелиг төлээ ылаңгыя автомобиль эрттирилге пунктуларын чаартыры-биле холбашкан айтырыгларны онза хайгааралда тудуп турар. Бо ажылдың сорулгазы – Сибирь регионнарын Азия чурттары-биле харылзаштырып турар амгы транспорт коридорларының эрттирилге шыдалын калбартырында. Анатолий Серышев биле Александр Ястребов чүък сөөртүлгезиниң өзүп турары-биле Моол-биле кызыгаарда каайлы инфраструктуразын чаартырының айтырыгларын чугаалашкан.
