Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Сибирь федералдыг округтуң регионнарын кел чыдар часкы үер болгаш өрт сезонунга белеткээр талазы-биле ведомстволар аразының комиссиязының хуралын удуртуп эрттирген.
«Сибирьде бо кыш улуг харлыг, соок болган, ол чүүл округтуң дыка хөй регионнарында часкы үер үезин нарыыдадыр дээрзи чигзиниг чок» — деп, бүрүн эргелиг төлээ хуралды ажыдып тургаш чугаалаан. Округтуң шупту регионнарында часкы үерниң болгаш өрттерниң уржуктарын чайладыр системалыг ажыл чоруп турарын демдеглээн, ындыг болзажок бойдус болуушкуннарының айыылы улуг хевээр.
Бүрүн эргелиг төлээ суг үериниң когаралын эвээжедир дизе, октаттынган суггат тудугларын тодарадып, оларның айыыл чок чоруун хандырар ажылды дүргедедирин сагындырган. Инженер тудугларының техниктиг хандырылгазынче онза кичээнгейни углаарын чугаалаан. Колдунда-ла суггат тудугларының инфраструктуразы эргижирээнинден суг эрттирер күчүзү чедишпес болганындан, чурттакчылыг черлер сугга алзып болур. «Суг эриктерин камгалаар чалдарны үезинде быжыглаар херек» - деп, Анатолий Серышев мурнады боттандырар айтырыгларның бирээзин айыткан.
Арга-арыгга, көдээ ажыл-агый черлеринге, дузалал участоктарга өртке удур айыыл чок чоруктуң дүрүмнерин сагып турарынга доктаамал хайгааралды организастаарын бүрүн эргелиг төлээ дааскан. Өртке удур айыыл чок чоруктуң дүрүмнерин хажытканы дээш харыысалгага онаажырын хамаатыларга тайылбырлаары чугула дээрзин ол демдеглээн.
«Транспорт аргыжылгазы үрелип болур чурттакчылыг черлерге кижилерниң бирги хереглелин хандырар курлавырларны баш бурунгаар тургузуп, суг үерин болгаш арга-арыг өрттерин болдурбас болгаш чайладыр хемчеглерни дүрген, доктаамал хандырарынга херек материалдыг болгаш саң-хөө курлавырларын деткиири чугула» - деп, Анатолий Серышев демдеглээш, бир эвес онза байдалдар тургустуна берзе, когарааннарны хүлээп алыр түр када чурттаар пунктуларны белеткээри чугула деп чугаалаан.
Оон аңгыда Анатолий Серышев «Россия Федерациязында уруглар эргелериниң кол магадылалдарының дугайында» федералдыг хоойлуже киирген өскерилгелер езугаар уруглар дыштанылгазын организастаарының дорт харыысалгазы регион губернаторларынга онаажырын сагындырган.
«Бо хоойлужудулгаже кирген өскертилгелерни барымдаалап, ведомстволар аразының регион комиссияларының уруглар дыштанылгазын болгаш кадыкшылын быжыктырарын организастаар ажылының чурумун эде көөрү чугула» - деп, бүрүн эргелиг төлээ демдеглээн. «Чурттакчы чонну болгаш девискээрлерни камгалаар кол айтырыгларны дүрген, чедимчелиг болгаш бүгү талалыг шиитпирлээр» - деп, бүрүн эргелиг төлээ түңнээн.
Арга-арыг болгаш чер кырының өрттерин болдурбас болгаш өжүреринге ужудукчу чок агаар системаларын ажыглаарын база чугаалашкан. Анатолий Серышев бо айтырыгны бодунуң контролюнда тудуп турар, хурал үезинде Сибирьниң регионнарында ужудукчу чок технологияларны ажыглалче киирери канчаар чоруп турарының дугайында делгереңгей илеткелди белеткээрин дилээн.
Россия Федерациязының Чиңгине прокурорунуң оралакчызы Сергей Зайцев, Россия Федерациязының хамааты камгалал, онза байдалдар болгаш айыыл-халаптар уржуктарын чайладыр талазы-биле сайыдының оралакчызы – статс-секретарь Денис Попов, федералдыг округ субъектилеринден бедик албан-дужаалдыг кижилер, Россияның ОБЯ, Ростеххайгаарал, Росарга-арыг, Росгидромет база Россугкурлавырларның территориалдыг органнарының удуртукчулары хуралга киришкен.