Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Красноярск крайның 90 чыл оюнга тураскааткан байырлыг хуралга киришкен. Бүрүн эргелиг төлээ крайның 90 чыл болганы-биле Россияның күрүне баштыңының байыр чедириишкинин регионнуң чурттакчыларынга дамчыткан.
«Хүндүлүг эштер! Улуг ужур-уткалыг хүн – Красноярск крайның 90 чыл ою-биле байыр чедирип тур мен. Россияның улуг регионнарының бирээзиниң төөгүзүн эрес-дидим, салым-чаяанныг, тура-соруктуг кижилер тургускан. Силер кадыг-берге байдалдарда күштүг суг электростанцияларын болгаш тоолчургу демир-орук шугумнарын, улуг үлетпүр бүдүрүлгелерин, далай болгаш хем порттарын туткан чаңгыс чер чурттугларыңарның хөй салгалдарынга чоргаарланып чоруур силер. Оларның күш-ажылчы чедиишкиннери күрүнениң национал байлаан көвүдеткен. Кадыг-дошкун болгаш чараш Сибирь черниң үндезин чурттакчыларының аттары бүгү делегейде билдингир» — деп, байыр чедириишкиннеринде бижээн.
«Силерниң Төрээн чериңерге сеткилиңер ханызындан ынакшылыңар, өгбелериңерниң чаңчылдарын төлептиг уламчылап, үлетпүр болгаш социал адырда, көдээ ажыл-агыйда, транспорт болгаш тудуг комплекстеринде улуг-улуг эгелээшкиннерни амыдыралда боттандырып турарыңар өөрүнчүг-дүр. Силерниң күжүңер, тура-сорууңар болгаш езулуг сибирьжи мөзү-бүдүжүңер ажыл-ижиңерге, Красноярск крайның болгаш бүгү чурттуң чечектелиишкининге чугула сорулгаларны шиитпирлээринге ам-даа дузалаар дээрзинге бүзүрээр мен. Силерге чедиишкиннерни болгаш бүгү-ле эки чүүлдерни күзедим» — деп демдеглээн.
Анатолий Серышев регионнуң, Сибирьниң болгаш бүгү чурттуң чечектелиишкини, Россия күрүнезиниң хөгжүлдезинге көскү чедиишкиннерни чедип алырынга үлүг-хуузун кииргени дээш Красноярск крайның чурттакчыларынга өөрүп четтиргенин илередип, күрүне шаңналдарын тывыскан.
Бүрүн эргелиг төлээ албан-хүлээлгелерин күүседиринге бедик профессионал чоруун көргүскен корум-чурум камгалаар органнарның, регионнуң күрүне болгаш муниципалдыг ажылдакчыларынга өөрүп четтириишкин бижиктерин тывыскан. «Россияның Президентизи Владимир Путинниң чугаалааны: бистиң оолдарывыстың мурнуку одуругда ажылдап турары дег, бөгүн кижи бүрүзү чуртувустуң тайбың келир үези болгаш сонуургалдарывыска дүүштүр сайзыраар арганы камгалап, ажылдаар ужурлуг бис» — деп, бүрүн эргелиг төлээ демдеглээн.
Красноярск край — Россия Федерациязының ийиги улуг субъектизи, ооң шөлү 2,3 млн дөрбелчин метр ажыг. Регионда 160 хире нацияларның төлээлери чурттап турар, оларның аразында Соңгу чүктүң, Сибирьниң болгаш Ыраккы Чөөн чүктүң үндезин чоннарының төлээлери база бар. Красноярск край 1934 чылда РСФСР-ниң Бүгү-российжи төп күүсекчи комитединиң Президиумунуң доктаалы-биле эрги Енисей губерниязының кызыгаарында тургустунган. 2007 чылда болуп эрткен референдумнуң түңнелинде, регионга автономнуг ийи – Эвенки биле Таймыр (Долган-Ненец) округтар кирген, оларны тускай эргелиг муниципалдыг районнар кылдыр эде кылган.
