Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Россия Федерациязының Чазааның Даргазы Михаил Мишустинниң Омск облазынга ажыл-албанының үезинде үдеп чораан. Делегация кежигүннери регионнуң найысылалында Ф.М. Достоевский аттыг Омскиниң күрүне университединге болгаш дайын хоочуннарының эмнелгезинге четкен.
Регионнуң баштыңы Виталий Хоценконуң саналы-биле дайын хоочуннарының эмнелгезинде эгелээн эде чаартылганы Россия Федерациязының Чазаа деткип турар. Чаартынган эмнелге удавас дужааттынар, ол тускай шериг операциязының киржикчилеринге эмчи дузазын чедирер чаңгыс аай комплекстиң бир кезээ апаар. Тускай шериг операциязының киржикчилеринге эмчи шинчилгелерин эртип, эмнедип болгаш реабилитация алырынга амгы үениң аргалары чедингир апаар.
Объектиниң капитал септелгезинче регион бюджединден 400 ажыг миллион рубльди шилчиткен. РФ-тиң Чазааның курлавыр фондузундан 385 хире миллион рубльди эмнелгениң дериг-херекселдерин четчелээринче киирген. Күрүне Баштыңының бүрүн эргелиг төлээзи Анатолий Серышев оран-саваның капитал септелгезин онза контрольда алган. Ол Сибирь регионнарынга ажылчын сургакчылаашкын үезинде ындыг хевирниң албан черлеринге албан чедер чаңчылдыг. Тускай шериг операциязының киржикчилерин болгаш хоочуннарын кадыкшыдар болгаш реабилизастаар инфраструктураны тудары шупту деңнелде эрге-чагырга органнарының кол сорулгаларның бирээзи дээрзин бүрүн эргелиг төлээ демдеглээн.
Ол ышкаш Россия Федерациязының Чазааның кежигүннери Ф.М. Достоевский аттыг Омскиниң күрүне университединге чораан. Университет химия, математика, физика, информастыг технологиялар, экономика, юриспруденция, филология база лингвистика дээш, аңгы-аңгы угланыышкыннарның специалистерин белеткеп турар. Университетке өөредилге үезинде, химия адырында шинчилел ажылдарынче онза кичээнгейни угландырган: ооң түңнелдерин фармацевтикага, ыжыкка удур эмнер чогаадырынга дээш, медицинаның өске-даа адырларында ажыглап турар. ОмКУнуң ажылдакчылары болгаш студентилери оон аңгыда, чурагайлыг сервистер чогаадырынга, физика шинчилелдеринге, российжи хоойлужудулганы сайзыраңгайжыдарынга база төөгү шинчилелдеринде идепкейлиг киржип турар.
Чаа өөредилге чылында Омскиниң күрүне университединиң баазазынга Аль-Фараби аттыг Казахстанның национал университединиң филиалы ажылдап эгелээрин дыңнаткан. Россияның Президентизи Владимир Путин 2024 чылдың ноябрь 27-де Казахстанга албан-езузу-биле аалдап чорааш, ийи чурттуң удуртукчулары киржип турда, ону тургузарының дугайында шиитпирни хүлээп алган. Ол базым Россия биле Казахстанның аразында эртем-өөредилге талазы-биле кады ажылдажылганы, ооң иштинде Евразийжи демнежилгени быжыглаар ужурлуг.
Алыс кедизинде «уруглар сады – школа – ортумак профессионал өөредилге/университет – бүдүрүлге» деп чаңгыс аай өөредилге экосистемазын тургузары планнаттынган деп регионнуң удуртукчузу демдеглээн. Бо арга школачыларга университеттиң курлавырларын ажыглаарынга, а студентилерге стажировкалар болгаш кады төлевилелдер дамчыштыр бүдүрүлгеге практиктиг арга-дуржулганы чедип алырынга дузалаар ужурлуг деп санап турар.
ТР-ниң Чазааның парлалга албаны.