Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев округтуң субъектилеринге «Ужудукчу чок авиация системалары» национал төлевилелди күүседириниң талазы-биле хуралды эрттирген. Видеоконференция харылзаазы-биле эрткен ужуражылгага Тываның Баштыңы Владислав Ховалыг, Тыва Республика талазы-биле кол федералдыг инспектор Александр Вавилихин, республиканың Транспорт, Өөредилге, Арга-арыг ажыл-агый яамыларының удуртукчулары киришкен.
«Ужудукчу чок авиация системалары» төлевилел 2030 чылга чедир Россияның Технологтуг хөгжүлдезиниң концепциязында быжыглаттынган эң идегелдиг 6 технологтуг угланыышкыннарының бирээзи дээрзин бүрүн эргелиг төлээ демдеглээн. Ону боттандырганының бирги чылында Россияның ужудукчу чок авиация системаларының рыногу 318 хуу өскен. Чоокку үеде ооң өзүлдезиниң темпизи чылда 58 хире хуу болурун эксперттер санаан. «Ада-чурттуң ужудукчу чок авиация системаларынга хереглелди деткиири» деп федералдыг төлевилелдиң боттандырылгазы аңаа дузалаар.
Оон аңгыда регионнар эрге-чагыргалары ийи федералдыг төлевилелде киржип турар: «Ужудукчу чок авиация системаларын болгаш кезектерин ажылдап кылыры, чаңгыс аайлаары болгаш хөйү-биле бүдүрери» база «Ужудукчу чок авиация системаларынга кадрлар». Бо төлевилелдерни боттандырарынче 2030 чылга чедир 148 млрд ажыг рубльди аңгылаары планнаттынган. Төлевилелдер ужудукчу чок авиация системаларының эртем- бүдүрүлге төптерин ажыдарынга субсидияны алыры-биле конкурс шилилгезинге идепкейлиг киржирин регионнарга сүмелээн.
Округтуң дөрт субъектизинде: Новосибирск, Томск, Иркутск база Омск областарда ындыг төптер амгы үеде ажылдап турар. Бүрүн эргелиг төлээ бо чылын Россияның Үлетпүр болгаш садыг яамызы бо мөөрейге киржир дээн чагыгларның федералдыг шилилгези эрте бергенин регионнар удуртукчуларының кичээнгейинче угландырган. Бөгүнгү арга-дуржулганы барымдаалап, 2026 чылда дараазында мөөрейге тиилээр дизе, 2026 чылдың күзүнге чедир үе барын сагындырган.
Ужуражылга үезинде «Ужудукчу чок авиация системаларынга кадрлар» төлевилелди боттандырар айтырыгже онза кичээнгейни угландырган. Округ федерациязының шупту субъектилери бо төлевилелди боттандырган. 94 өөредилге черлери ол талазы-биле специалистерни белеткеп турар. Федералдыг акшаландырыышкын-биле ужудукчу чок авиация системазын чогаадып кылыр, бүдүрер болгаш ажыглаар өөредилге чорудуун боттандырарының федералдыг төлевилелинде киржип турар 30 регионнуң санынче Сибирьниң үш региону – Алтай край, Иркутск база Томск областар кирген.
Бүрүн эргелиг төлээ хуралды түңнеп тура, округтуң регионнарының бөгүн алган арга-дуржулгазы ужудукчу чок ужур чүүл адырын акшаландырарының федералдыг системазынче кирип, боттарының девискээрлеринге улус ажыл-агый комплекизиниң шупту кол угланыышкыннарында айтырыгларны чедиишкинниг шиитпирлээр арганы бээр ажылдыг бүдүрүлге төптерин тургузуптарынга бүзүрелин илереткен.
Хуралга Россия Федерациязының Чиңгине прокурорунуң Сибирь федералдыг округ талазы-биле эргелелиниң, Россияның ИХЯ болгаш ФСБ-ниң округ чөвүлелдериниң удуртукчулары, регионнарның баштыңнары база округ федерациязының субъектилериниң талазы-биле кол федералдыг инспекторлар база киришкен.