Россия Федерациязының Президентизиниң Сибирь федералдыг округта бүрүн эргелиг төлээзиниң чанында Чөвүлелдиң түңнел хуралы Москвага болуп эрткен. Анатолий Серышевтиң удуртулгазы-биле регион удуртукчулары округтуң федерация субъектилериниң 2025 чылда социал-экономиктиг хөгжүлдезин түңнеп, келир үеде кол сорулгаларны айыткан.
2025 чылда Сибирьде 300 ажыг эмнелге албан черлери, школалар, уруглар садтары, клубтар болгаш библиотекалар туттунуп чаарттынган, 900 ажыг девискээрлер чаагайжыттынган. Округ бо чылын 8 миллион дөрбелчин метр ажыг ниити шөлдүг тудугну ажыглалче киирип, федералдыг округтар аразындан чуртталга тудуунуң деңнели-биле мурнунче үнген. Анатолий Серышев тудугну тударындан аңгыда, хоорайларывыстың аян-хевирин тургузарынче кичээнгейни угландырар херек деп онзалап айыткан. Хемчээли болгаш турар черинден хамаанчокка, чурттакчы чонга социал болгаш культура инфраструктуразы, таарымчалыг хөй-ниити черлери болгаш эптиг транспорт чедингир болур ужурлуг.
Хурал үезинде бүгү деңнелдиң эрге-чагырга органнарының шыңгыы кичээнгейин негеп турар чидиг айтырыгларны база чугаалашкан. Бүрүн эргелиг төлээ социал ужур-уткалыг объектилерниң ажыглалче киирер хуусааларынче эң кол кичээнгейни салган. Сибирь регионнарында 15 школаның болгаш 18 кадык камгалал албан черлериниң тудуу ам-даа доозулбаан. «Бүрүн эргелиг төлээниң аппарады кандыг-бир чүүл болдунмас болза, дузалажып база деткип кээринге кезээде белен. Хуусаазында бүтпейн баар хире болза, дарый дыңнадырыңарны дилеп тур мен, кандыг хемчеглер алырын кады шиитпирлептер бис» — деп, Анатолий Серышев чугаалаан.
Бүрүн эргелиг төлээниң аппарадының идепкейлиг кады ажылдажылгазының ачызында чаңгыс эвес удаа чылдырып келген элээн каш улуг объектилер тудуу доозулган. Президентиниң хүлээп алыышкынынче болгаш күрүне Баштыңының дорт шугумунче кирген айтырыглар ам-даа бар деп ол немээн. Ылаңгыя акша-шалың төлевиринде саадаашкыннар база чуртталга-коммунал ажыл-агый адырында чидиг айтырыглар барын бүрүн эргелиг төлээ айыткан.
«Округтуң регионнарында Россия Федерациязының Президентизиниң хүлээп алыышкын черлеринче 5 муң ажыг билдириишкиннер кирген. Оларның хөй кезии социал адырда болгаш чуртталга-коммунал ажыл-агыйында тодаргай айтырыгларга хамааржыр. Бир эвес хамаатылар Президентиже хомудалды киирип турар болза, ол дээрге чер-черлерде эрге-чагырга органнары кижилерниң чидиг айтырыгларынга чогуур харыыларны бербейн турары ол-дур» — деп, Анатолий Серышев хуралдың киржикчилеринге чугаалаан. Президентиниң даалгалары кайы хире күүсеттинип турарын хынаары-биле, бүрүн эргелиг төлээ чериниң аппарадының ажылдакчылары регионнарже үнүп ажылдаар арга-дуржулгазын ам-даа уламчылаарын ол чарлаан.
Тускай операцияның киржикчилерин болгаш хоочуннарын деткиири, ол ышкаш чаа регионнарда шефте алганы девискээрлерде катап тургузуушкун ажылдарын база чугаалашкан. Анатолий Серышев ол ийи айтырыгга харыысалгалыг болурун демдеглээн. Регионнуң удуртукчулары дайынчыларга болгаш оларның өг-бүлелеринге дуза көргүзери-биле холбашкан шупту хемчеглерге боттары киржип, ону доктаамал хайгаарап көөрү чугула.
«Эмчи болгаш психологтуг дузалар адрестиг болгаш комплекстиг болур ужурлуг. Бир эвес херек болза, эртем-билиг чедип алырынга, ажыл-агыйга тургустунарынга база амыдырал байдалын экижидеринге дузаны көргүзер апаар. А ол айтырыгларны доктаамал кичээнгейге тудары чугула» — деп, бүрүн эргелиг төлээ чугаалаан.
Кижилерниң чаагай чоруу, оларның амыдырал-чуртталгазын бедидери, Россияның чонун кадагалап арттырары – шупту чазак органнарының мурнады боттандырары угланыышкыны бооп артар деп, Анатолий Серышев чугаалаан. «Ылаңгыя Сибирьге бо чүүл чугула — бистиң регионнарывысты, улуг хоорайларны, биче суурларны чурттаарынга ёзулуг таарымчалыг черлер кылдыр чаагайжыдары херек» — деп, ол немээн.
Анатолий Серышев бодунуң чугаазын доозуп тура, келир чылын чугула иштики политиктиг болуушкун – федералдыг парламент соңгулдалары, ол ышкаш Тыва Республиканың Баштыңының, Сибирьниң дөрт регионунуң хоойлужудулга органнарының база муниципалдыг соңгулдалары болуп эртерин сагындырган. «Бистиң сорулгавыс – Россия Федерациязының Президентизин долгандыр ниитилелдиң каттыжыышкынын болгаш демниг чоруун база ооң салган курузу-биле чоруурун хандырары болур» – деп, бүрүн эргелиг төлээ түңнээн.
