Чоннуң кичээнгейинде
Чылдың-на апрель 27-де бистиң чуртка Российжи парламентаризм хүнүн демдеглеп эрттирип турар. “Россияның дайынчы алдарының болгаш тураскаалдыг хүннериниң дугайында” федералдыг хоойлуже өскерилгелерни Россия Федерациязының Президентизи Владимир Путин 2012 чылда кииргени-биле Российжи парламентаризм хүнүн доктаадып тургускан. Бо хүннү апрель 27-де демдеглээр деп шиитпирниң хүлээп алдынган чылдагааны – 1906 чылдың апрель 27-де Россия империязының Күрүне Думазы ажыл-чорудулгазын эгелээни.
Российжи парламентаризм хүнүн тургусканының бир ужур-дузазы – РФ-тиң Федералдыг Хуралының болгаш регионнарда хоойлужудулга эрге-чагыргазының ажылынга чурттуң чурттакчы чонунуң кичээнгейин хаара тудары. Чүге дээрге хоойлужудулга болгаш төлээлекчи эрге-чагыргаларның ажылындан күрүнеде социал-экономиктиг, ниитилел-политиктиг байдал кончуг хамааржыр. Ынчангаш Российжи парламентиниң ажылы чоннуң доктаамал кичээнгейинде деп болур.
Тыва парламентаризмниң төөгүзү 1921 чылдың август 15-те Тыва Улус Республиканы доктаадып тургусканы, Тываның баштайгы Үндезин хоойлузун хүлээп алганындан эгелээн. Тыва парламентаризм хөгжүлдениң узун болгаш нарын оруун эрткен. Ооң ажыл-чорудулгазындан чүгле Тыва Республикада эвес, оон дашкаар ниитилел-политиктиг болуушкуннар хамаарылгалыг апарган.
Российжи парламентаризм хүнүнүң бүдүүзүнде Санкт-Петербург хоорайга эрткен Россия Федерациязының Хоойлужудукчулар чөвүлелиниң эрттиргени хемчеглерге ТР-ниң Дээди Хуралының даргазы Кан-оол Даваа киришкен. Ол хемчеглер үезинде Севастополь хоорайның Хоойлужудулга Хуралының даргазы Владимир Немцев биле ТР-ниң Дээди Хуралының даргазы Кан-оол Даваа ийи регионнуң хоойлужудулга органнарының аразынга кады ажылдажылга дугайында дугуржулганы чарып, аңаа хол үжүүн салганнар.
“Тыва биле федералдыг ужур-дузалыг хоорай Севастопольдуң аразында кады ажылдажылга парламент харылзааларындан эгелээни бир янзы-дыр” – деп Кан-оол Даваа чугаалаан.
Ш. ЛОПСАН белеткээн.