- Чимистиг ыяштарны хевирлеп, артык будуктарын кезер, тарылганы чорудар;
- Кышкы үеде чылыглап, шуглап каан ыяштарны ажык агаарга чаңчыктырар;
- Ыяштарның уннарын чугайлаар, чемишчидилгезин кылыр;
- Чаш ыяштарны (саженцы) олуртур;
- Огород шөлүн аштап-арыглаар.
Участокту кажан илииртеп болур?
Хөрзүннүң байдалын көөр. Бир эвес ол өл, шык болза илииртеттинмес — довурак дырбаашка чыпшынып туруп бээр. А кадып калган болза, ону чуура соктаары берге ажыл. Кажан хөрзүннүң шыгының өй-тавын көрүп тургаш дырбааштаарга, борбакташкан хөрзүн боду-ла тоглап каар.
Ирик өдекти үнүштүң оңгарынче каар бе азы бүдүн участокту шывар бе?
Бүгү участокту шыпканы дээре, ол хөрзүннүң бедик дүжүткүр болурунга дузалаар. А оңгарынче — иринди эвээш таварылгада, камналганы бодап каар.
Чазын чалдарга өдек салып болур бе?
Чаа өдекти салып болбас – ында аммиактың бедик концентрациязы бар, ол үнүштерниң дазылдарын өрттендир чиптер. Огородче ону чүгле күзүн, хөрзүннү казып тургаш каап болур. Эвээш дизе, бир чыл чыткан эрги өдекти чазын огородка ажыглап болур.
“Шын” №24 2024 чылдың март 30
