2023 чылдыӊ январь 1-ден тура Арат-фермерлер көдээ ажыл-агый бүдүрүкчүлери чер участогун, садыглажыышкын чокка, хөлезилеп ап болур.
Көдээ ажыл-агыйынга ажыглаар черлерниӊ саарылгазыныӊ дугайында хоойлуга, Чер хоойлузунга өскерилгелерни ында киирген.
Арат-фермер ажыл-агыйлары черни беш чыл хире хуусаага хөлезилеп алгаш, улаштыр ону хуужудуп ап болур.
Шак ындыг сорулгалыг чер участогунга аалчылар бажыӊы, чурттаар бажыӊ-балгат тутпас, ону өске улуска дамчыдып бербес, арендага безин берип болбас, чүгле көдээниӊ ажыл-ижинге ажыглаар.
Көдээ черде өг-бүлелерниӊ улуг эвес ажыл-агыйын деткииринге дузалыг болур. Ооӊ мурнунда чер участогун хөлезилеп алыр дээш, олар улуг агрокомпаниялар-биле кады аукционга киржир ужурга таваржып турган. Хоойлунуӊ чаа өскерилгелериниӊ ачызында, арат-фермер ажыл-агыйлары бүдүрүп үндүрүп турар барааннарыныӊ хемчээлин көвүдедир боор дээрзинге чазак идегеп турар дээрзин Россияныӊ Чазааныӊ Даргазы Михаил Мишустин тайылбырлаан.
Херек кырында көдээ ажыл-агыйынга ажыглаттынмайн турар черлер бар. Арат-фермерлерниӊ болгаш көдээ ажыл-агый бүдүрүкчүлериниӊ ассоциациязы шак ындыг черлерни сорулгазынга дүүштүр ажыглалга киирери-биле хоойлуну өскертирин каш чыл бурунгаар саналдаан.
Россияныӊ көдээ ажыл-агый хайгааралыныӊ Тывада Эргелелиниӊ медээзи-биле Р.Демчик белеткээн.