Республиканың диспетчер албанының медээзинден алырга, сентябрь 6-да эртенгиниң 8 шак 40 минута турда, Тыва Республиканың арга-арыг фондузунуң черлеринде 26604 га шөлдүң 16 өрттү болуп турар. Оларның 1337 га черде Таңдының, Шагаан-Арыгның, Чадаананың база Улуг-Хемниң ниитизи-биле 6 арга-арыг даамалдарында өрттү өжүрген.
Сөөлгү хонукта 1719,07 га шөлде 4 өрттү, ол ышкаш «Азас» заповедниктиң девискээринде 10 га шөлде өрттү узуткаан.
Таңды, Чеди-Хөл, Каа-Хем, Чөөн-Хемчик база Улуг-Хем кожууннарның девискээрлеринде өрттер ам-даа хыппышаан.
Өрт өжүрүлдезинде 399 кижини база 30 техниканы хаара туткан. Тываның өртчүлери-биле кады чалбыыш-биле демиселди Красноярск крайның, Новосибирск, Иркутск, Томск областарының болгаш Хакас база Бурят республикаларның 261 ажыг авиа арга-арыг камгалаар албанының ажылдакчылары чорудуп турар.
Сентябрь 6-да республиканың чамдык черлеринге диңмирээр. 4-кү класстың өрт айыылын Бай-Тайга кожууннуң девискээринде демдеглээн.
Өрттер-биле байдалдың нарыыдаанын барымдаалааш, арга-арыг кирерин бүрүнү-биле 2024 чылдың август 17-ден эгелээш хораан.
Бистиң корр.
Чурукту интернеттен алган.
“Шын” №68 2024 чылдың сентябрь 7
