Регионалдыг диспетчер албанының дыңнатканы болза, 2024 чылдың август 6-да Тыва Республиканың арга-арыг фондузунуң черлеринде 3694 га черде 22 арга-арыг өрттери ам-даа хып турар. Тожу биле Балгазынның арга-арыг ажыл-агыйларында 11 га шөлде ийи өрттү өжүрген.
Эрткен дүне чагган чаъс хып турар черлерни чүгээр өжүрген-даа болза, чер-черлерде ам-даа имистелдир хыппышаан деп, республиканың Арга-арыг яамызы тайылбырлаан. Ол көстерни өжүрер даалга өртчүлер мурнунда салдынган. Авиамониторинг түңнелдери-биле бо кежээ байдалдың кандыызы билдине бээр.
Бөгүнде Тере-Хөл, Кызыл, Бии-Хем, Таңды, Чеди-Хөл, Тес-Хем, Улуг-Хем база Тожу кожууннар девискээрлеринде арга-арыг өрттери хып турар. «Азас» заповедниктиң арга-арыгларында ийи өрт бар.
Өрттер өжүрүлдезинде 222 кижини база 39 санныг техниканы хаара туткан. Курлавырда 94 кижи база 88 санныг техника бар.
Шупту арга арыг-арыг өрттери чаңнык дүшкенинден өөскээн.
Август 6-да республиканың чамдык черлеринге күштүг чаъстаар, чаңныктаар, күштүг хадыыр, дүне хаттың күжү секундада 17-22 метр, хүндүс секундада 15-18 метр чедер. Кызыл кожуун девискээринге 5-ки класстың, Улуг-Хем база Бии-Хем кожууннарга 4-кү класстың өрт айыылы хевээр арткан.
Республиканың арга-арыг фондузунуң девискээринде арга-арыг өрттери-биле нарын байдалды көргеш, август 4-де Тыва Республиканың Баштыңы Владислав Ховалыг регионалдыг деңнелдиг онза байдал чурумун чарлаан. Ол үеде арга-арыг кирерин шуут хораанын сагындыраалыңар.
ТР-ниң Чазааның парлалга албанының медээлеринден.
"Шын" №59 2024 чылдың август 7
