Армейжи культура хүннерин Тывада бир-ле дугаар эрттирип турар! Аңаа тураскаадып, бо хүннүң езулуг утказын – бистиң ада-чуртувустуң төөгүзүн, Россияның маадырлыг чыл бижимелиниң алыс утказын, төрээн чуртка ынакшылды илередип турар ажыл-хемчеглерниң солун болгаш байлак программазы бисти манап турар.
Бо шакта бистиң хамаарышпас чоруувус болгаш хосталгавыс дээш дайылдажып турар Ада-чурттуң эрес-дидим камгалакчыларынга, россий армияның шериг албанныгларынга база эки турачыларга чоргаарланып турар бис.
Маадырлыг күш-ажылдың болгаш Төрээн чуртту карак огу дег камгалап, кадагалаарының дугайында билиишкинни салгалдардан салгалдарже дамчыдып чедирерин бистиң ыдыктыг хүлээлгевис деп санап чоруур бис. Россияның Камгалал яамызынга, ооң культура талазы-биле департаментизинге регионнарга онза хамааты-патриотчу фестивальды – Армейжи культура хүннерин организастап эрттирип турары дээш онза байыр чедириишкинин илередип тур бис. Бистиң тыва черде Россияның Армиязының өндүр улуг профессионалдары, ат-сураа алгаан чогаадыкчы коллективтери четкилеп келген-дир.
Хүндүлээчел тыва черге бистиң аалчыларывысты өөрүп уткуп тур бис.
Армейжи культура хүннери чүгле улуг артистеривистиң уран-талантызынга мөгеер шинекти берип турар эвес, а хөй планныг программаның иштинге мастер-класстар, чугаалажыышкыннар болгаш сайгаржып чугаалажыр, эксперттер үнелээшкиннерин дыңнаар, ажыл-иштиң чаа чогаадыкчы хевирлери-биле таныжар арганы берип турар.
Тыва Республикада Армейжи культура хүннериниң ажыдыышкыны-биле байыр чедирип, үре-түңнелдиг ажылды күзедим.