Тывадан 35 школачы «Артек» делегейниң уруглар төвүнге 2024 чылдың ноябрь 13-тен декабрь 3-ке чедир дыштанган.
Артекте «Бистиң шилип алган оруктарывыс» деп кыйгырыг-биле чоруп турар 13-кү тускай угланыышкынныг сменаже тыва школачылар кирген. Уругларны аңгы-аңгы бөлүктерже чарып, башкылар оларга 21 хонук дургузунда делгереңгей программаны белеткээн. Школачылар бо неделялар дургузунда янзы-бүрү ажылдарга боттарын шенеп, керамика, авиамоделирование, ус-дааранылга, флористика дээш оон-даа өске уруглар студияларынга мастерлерниң рольдарын шенеп көргеннер. Уруглар культурлуг экскурсияларга, походтарга киржип, солун кижилер-биле ужуражып танышканнар. Кежээниң-не эртип турар культура-массалыг чыыштарны сонуургааннар.
«Шилип алган оруктарывыс» деп дыштанылга ээлчээ уругларның амыдыралынга уттундурбас кылдыр артып каар дээрзинге бүзүрээр мен»— деп, Владислав Ховалыг бодунуң блогунда уругларның идепкейлиг дыштанылгазының солун чуруктарын парлаан. Тыва школачыларга бо болуушкун, шынап-ла, улуг төөгүлүг. Россияның Өөредилге яамызы Кызылдың 20 дугаар школазынга Билиглер хүнүнде чурттуң Президентизи Владимир Путинниң эрттиргени «Чугула чүүлдер дугайында чугаа» деп кичээлдиң киржикчилеринге путевкаларны берген.
Тывадан салым-чаяанныг школачылар, хөй ажы-төлдүг өг-бүлелерниң база тускай шериг операциязының киржикчилериниң уруглары дээш 25 уруг “Артектиң” ол-ла сменазынга дыштанып турган.
Тывага 2023–2024 өөредилге чылы күрүне баштыңының киржилгези-биле эгелээн. Владимир Путинниң эрттиргени ажык кичээл үезинде өөреникчилер ТШО киржикчилерин деткииринден эгелээш, Президентиниң ажыл графиги, туризмниң хөгжүлдези, уругларның дыштанылга лагерьлерин тудары болгаш школага даштыкы дылдар өөредилгезинге чедир янзы-бүрү темаларны сонуургаан.
Бистиң корр.
«Шын» №93 2024 чылдың декабрь 4
