| «Күзелдер шивизи» акция |
Россияның Президентизи Владимир Путинниң эгелээшкини-биле 2018 чылда «Күзелдер шивизи» акция эгелээн.
Амыдыралдың берге байдалынга таварышкан уругларга өөрүшкүнү сөңнеп, тоолчургу Чаа чылды көргүзери – акцияның сорулгазы. Төлевилел Чаа чыл бүдүүзүнде дуза херек кижилерниң күзелдерин боттандырар буянныг кижилерни каттыштырып турар. Акцияга тускай шериг операциязының киржикчилериниң ажы-төлү, амыдыралдың берге байдалынга таварышкан, кадыының байдалы кошкак база өскүс уруглар, ол ышкаш орулгазы эвээш өг-бүлелерниң 3 хардан 17 харга чедир ажы-төлү киржип турар.
Тывага бо акция 2020 чылдан боттанып эгелээн. Бо чылын хуулгаазынныг акцияны уламчылаары-биле, декабрь 17-де чылдың эртер хемчегни «Баштайгыларның шимчээшкини» организастаан. Хемчегге ТР-ниң Баштыңы Владислав Ховалыг-биле кады Чазак кежигүннери база федералдыг тургузугларның тус чер органнарының удуртукчулары киришкен.
«Ачы-буянныг акцияга киришкеш, уругларның аттарын болгаш күзелдерин бижээн шарларны байырлал шивизинден шилип алдым. Ында Качык сумузундан 7 харлыг Аруна биле Хандагайтыдан 8 харлыг Хаяның Чаа чылда алыксаан күзелдерин бижээн болду. Уругларның күзелдерин боттандырарын болгаш оларга ёзулуг шын хуулгаазын чүүлдү канчаар сөңнээрин боданыр апаар мен.
Чаа чыл — уруг бүрүзүнүң күзелдиг белээн алыксаар хуулгаазынныг үе. Тускай шериг операциязының киржикчилериниң ажы-төлүнге онза кичээнгейни салып турар бис. Бистиң бир кол инвестору- вус — «Эльбрусметалл литий» компаниязының ачызында эрес-дидим дайынчыларывыстың ажы-төлүн шуптузун Чаа чыл белектери-биле өөртүр аргалыг болдувус» — деп, Тываның Баштыңы Владислав Ховалыг чугаалаан.
Акцияның Тывада организакчызы — «Баштайгыларның шимчээшкини» регионалдыг салбырның удуртукчузу Эртине Кууларның чугаазы-биле алырга, елкажеланий.рф/ деп сайтыга кирген күзелдерни шуптузун күүседир ажылдар эгелээр, ол 2026 чылдың февраль төнчүзүнге чедир уламчылаар.
Бо хүн «Күзелдер шивизинден» удуртукчуларның шилип алган шарларында аңгы-аңгы күзелдер бар — хөгжүм херексели, угаан сайзырадыр конструктор, өөредилгеге херек амгы үениң херекселдери, спортчу дериг-херексел дээш оон-даа өске.
Күзелдер күүседир «илбичилер» уругларның күзээн белектерин Чаа чыл бүдүүзүнде тыпсырын аазааннар. Чижээ, Чазак Даргазының оралакчызы Орлан Сарыглар Кызыл хоорайдан 16 харлыг Оргаадайга спортчу костюмну белекке сөңнээр. Тыва Республика талазы-биле Росгвардия албанының начальниги Алексей Корниенко Яндекс-станция күзеп турар 13 харлыг Киваага Чаа чыл белээн боду барып тыпсырын аазаан. Тываның прокурору Евгений Ботвинкин 14 харлыг Викторияга чадаг-терге сөңнээр болган.
«Биске «Күзелдер шивизи» анаа-ла Чаа чыл бүдүүзүнүң кампаниязы эвес, кичээнгей болгаш деткимче хереглеп турар уругларга ёзулуг хуулгаазын деп чүүлге бүзүрелди оттурар чугула социал төлевилел-дир» — деп, акцияның киржикчилери демдеглээн.
А. СОЯН.
Чиңгис СААЯНЫҢ тырттырган чуруктары.
“Шын” №50 2025 чылдың декабрь 25