Арыг-силиг хүннерин чарлаан

Тывада «Арыг хоорай. Арыг суур» губернатор төлевилели боттанып эгелээн. Республиканың Баштыңының даалгазы-биле регионнуң Чуртталга-коммунал ажыл-агый яамызы эрткен чылын ук төлевилелди ажылдап кылган. Март 27-де «Арыг хоорай. Арыг суур» төлевилелдиң иштинде кирип турар бүдүн комплекс хемчеглери стартты алган.

Ынчалдыр бо неделядан эгелээш, апрель 28-ке чедир республикага албан организацияларның киржилгези-биле неделя санында субботниктер болур. Пятница хүннерин Арыг-силигниң хүнү кылдыр чарлаан. Албан организацияларның чанында девискээрлерге, бажыңнар чанының участоктарынга база хөй-ниити черлеринге арыг-силигниң чурумун тудар.

Кел чыдар май байырлалдарында Тываның кожуун, хоорайларынга арыг-силигни тургузары-биле бүгү күштү мөөңнээринче ажылчын коллективтерни, хөй-ниити организацияларын, волонтерлар шимчээшкиннерин, ол ышкаш шупту чурттакчы чонну республиканың чуртталга-коммунал ажыл-агый ажылдакчылары кыйгырып турар.
Чаагайжыдылга, ногаанчыдылга база республиканың муниципалдыг тургузугларының аразынга арыг-силигни тургузар талазы-биле, арыг-силиг болгаш корум-чурумну сагыыр талазы-биле контрольдуг болгаш профилактиктиг хемчеглерни, арыг-силигни тургузарынга тускай техниканы садып алырынга «Арыг хоорай. Арыг суур» губернатор төлевилели-биле чыл санында республика болгаш кожуун чергелиг мөөрейни эрттирер.

Ол ышкаш апрель айда республикага чөпшээрел чок бок төгер черлерни узуткаар талазы-биле улуг кампания чорударын уламчылаар. Бо чылын 5 кожуунга, ниитизи-биле 72 футбол шөлүнге дең, 51,5 га шөлдү боктан аштап-арыглаарын планнап турар деп, Чуртталга-коммунал ажыл-агый яамызы дыңнадып турар.

Бок девискээрлерин аштап-арыглаар ажылдар республиканың барыын талазындан эгелээр – Чадаана болгаш Ак-Довурак хоорайлар, дараазында Чаа-Хөл суур база Шагаан-Арыг хоорай. Чайның ийиги чартыында Эрзин кожууннуң Эрзин, Мөрен, Нарын, Бай-Даг база Булуң-Бажы суурларда чөпшээрел чок черлерде бокту аштап-арыглаар.
/ Бистиң корр.

"Шын" 2023 чылдың апрель 1 №23

#Шын #Тыва #ТываЧазак #АрыгХоорайАрыгСуур