«Таарымчалыг хоорай хүрээлеңин хевирлээри» федералдыг төлевилелди Улуг-Хем кожууннуң девискээринге боттандырары-биле, Арыг-Үзүү суурга Алдар шөлүн апрель 30-де ажыдар. Ооң ниити акшаландырыышкынының түңү 7 сая рубль.
Мурат Ховалыгга удурткан «Шагонар Сервис» КХН Алдар шөлүнүң чаагайжыдылгазын болгаш ногаанчыдылгазын кылып чорудар. Дайынчыларга тураскааткан тураскаалды кылырын Николай Логиновтуң удуртканы «Литсиб» КХН хүлээнип алган. Ам бо хүнде тураскаалды «Литсиб»-тиң Красноярскыда мастерскаязында кылып доозупкан, ону амгы үеде Арыг-Үзүүнче эккеп, Алдар шөлүнге тургузары арткан.
Тывадан Афганистанга интернационалчы хүлээлгезин күүседип тургаш, маадырлыы-биле амы-тынындан чарылган маадырларга Улуг-Хемниң Арыг-Үзүүнден алышкылар Игорь Солдуп биле Гера Балчый база хамааржырлар.
Чечен дайынының киржикчизи, маадыры Петр Севек милицияның майору эргелиг.
Украинада тускай шериг операциязының киржикчизи, Россияның Маадыры Мерген Донгак база Арыг-Үзүүнден болуп турар.
Маадырлар чурту Арыг-Үзүү суурга ажыттынар Алдар шөлүнүң автору Улуг-Хем кожууннуң кол архитектору Карина Комбуй.
/ Мерген КЫРГЫС.
Карина КОМБУЙНУҢ тыртырган чуруктары.
"Шын" №31 2023 чылдың апрель 29
