Эрзин кожуун төвү болгаш суурларда апрель 5-тен тура девискээрлер аштап-арыглаар ажылдар эгелээн. Мөрен школазының коллективи директору Ольга Михайловна Ижиниң удуртулгазы-биле арыглаашкын ажылынга идепкейлиг киржип турарлар. Ам школавыстың ишти-дашты дыка арыг-силиг. Школада эң-не идепкейжи башкыларга Долита Намдалды, Галина Хомушкуну, Галина Сотнамны, Чечена Дензинни дээш өскелерни адап болур.
Ол ышкаш часкы тарылга үези база чоокшулаан. Бо чылын тараа, ногаа аймаа эки үнер боор деп бодап тур мен, черниң шыгы эки-дир. Ынчалза-даа шөлдерже буга сугларын бадырар болза эки. Мөрен суурда сиген тарып өстүрүп турар ажылгыр-кежээ улус база бар. Юрий Морзуевич Учурал чылдың-на хөй чылдыг сигенни тарып-өстүрүп, малчыннарны сиген-биле хандырып турары мактаксанчыг. Ол-ла шөлдерде картофель база өзүп турар. Урана Ооржак база хөй чылдыг сигенни өстүрүп турар.
Мөрен школазының эмчизи Белла Дамдынның ногаа, картофель тарыыр талазы-биле дуржулгазы улуг. Мен бодум Оваа-Даш деп черде картофельди тарып, эки дүжүттү ап турар мен. Сумунуң даргалары удавас часкы тарылга ажылдарын организастап эгелээр. Амгы үеде малчыннарның хой-өшкү оолдаашкыны кидин түлүк чоруп турар. Бо кыжын хар улуг-даа болза, малчыннарывыс кызып ажылдап турарлар.
Чечекмаа САДИ, ТР-ниң алдарлыг ажылдакчызы.
Мөрен суур.
“Шын” №27 2024 чылдың апрель 10