Бии-Хем кожууннуң Аржаан ортумак школазында тускай шериг операциязынга дайынчы албан-хулээлгезин күүседип тургаш амы-тынындан эрес-дидими-биле чарылган дайынчылар Алексей Михайлович Сарыгның база Начын Васильевич Давааның чырык адынга тураскаадып «Маадырларның парталарын» ажыткан.
Сактыышкын ёзулалынга маадырларның чоок кижилери, өг-бүлези, чаптанчыг ажы-төлү, ада-иези, дөргүл-төрели, башкылары, чаңгысклассчылары, коллегалары база Тыва Республиканың Дээди Хуралының депутады Аяна Монгуш, "Ада-чурт камгалакчылары" Күрүне фондузунуң Бии-Хемде социал координатору Шимит Сувак, Ада-чурт дайынчыларының өг-бүлелериниң комитединиң Бии-Хем кожуунда салбырының удуртукчузу Татьяна Монгуш, Аржаан школазының коллективи база кожуун чагырыкчызының социал айтырыглар талазы-биле оралакчызы Орлан Байкара база тус чер чагыргазының удуртулгазы маадырларның дугайында сактыышкыннарын чыылганнар-биле үлешкен.
Дайынчыларның дугайында чырык сактыышкыннар кезээ мөңгеде артар. Эрес-дидим, коргуш чок, даңгыраанга болгаш албан-хүлээлгезинге шынчызын көргүзүп, тайбың дээш амы-тынын өргээн маадырларывыс кезээ мөңгеде уттундурбас. Ынчангаш маадырлыг дайынчыларывысты сактып, чырык адын мөңгежидип, күдүк базып мөгейип чоруур бис.
Чер-делегей кырынга кезээ мөңгеде чүгле быжыг тайбың, эп-найырал, ак-көк дээр турар болзун. Төрээн Тывавыстың оолдары тиилелгелиг чанып келирин күзээр бис.
Өөредилгезинге шылгараан база школаның болгаш кожууннуң амыдыралынга идепкейлиг киришкен өөреникчилер Маадырларның партазынга олурар эргени алган.
Ол ышкаш школага маадырларга тураскаадып Бии-Хем кожууннуң командаларының аразынга бут бөмбүүнге болгаш хол бөмбүүнге спортчу маргылдаалар болуп эрткен.
ТШО-га амы-тынындан чарылган дайынчыларның сактыышкын турнирлери бистиң кожуунда чаңчылчаан. Ол дээрге анаа-ла спортчу хемчеглер эвес, ханы хүндүткелдиң болгаш чырык кажыыдалдың демдээ-дир. Бо хемчеглерни организастап эрттиреринге киришкен кижилерге улуу-биле өөрүп четтиргенивисти илередип мөгейдивис. Бистиң маадырларывыс кезээ мөңгеде уттундурбас.
Бии-Хем кожууннуң медээзинден.
“Шын” №17 2025 чылдың май 8
