“ҮСТҮҮ-ХҮРЭЭ"–2024
Чадаана хоорайга июль 9–11 хүннеринде дириг хөгжүмнүң «Үстүү-Хүрээ фестивалы болуп эртер. Аңаа бистиң чурттуң янзы-бүрү булуңнарындан артистер киржир. Ооң ат-сураглыг киржикчилериниң аразында — Софья Кара-оол болгаш «Тыва Джаз Бэнд».
Республиканың Культура яамызының медээзи-биле алырга, “Тыва Джаз Бэндиниң” хөгжүмчүлери— ёзулуг профессионалдар, Чөөн Сибирьде культура болгаш уран чүүл академиязында Тыва Республиканың уран чүүлүнүң алдарлыг ажылдакчызы, үрер хөгжүм херекселдери кафедразының доцентизи Петр Казимирниң (Красноярск) болгаш эстрада уран чүүлү кафедразының эргелекчизи, профессор, РФ-тиң болгаш Бурят Республиканың уран чүүлүнүң алдарлыг ажылдакчызы, саксофончу, флейтажы, делегей, бүгү россияның, регионнар аразының мөөрейлериниң шаңналдарының эдилекчизи Валерий Симоновтуң клазының доозукчулары бар.
Кол дирижер — Тыва Республиканың алдарлыг артизи Начын Донгак.
Коллективтиң репертуары доктаамал чаарттынып турар. Ында композитор Владимир Токаның джаз чогаадыглары, Игорь Дулуштуң эде ажылдааны болгаш эде аянчытканы-биле тыва улустуң ырылары бар. Коллективтиң ыраажызы Тыва Республиканың улустуң артизи Софья Кара-оол “бэндиниң” бүгү төлевилелдеринде киржип турар. Ооң күүселдезинде джаз өткүт, чараш, күштүг дыңналыр.
Бодунуң тургустунган үезиниң дургузунда «Тыва Джаз Бэнд» джаз делегейинде сураглыг хөгжүмчүлер-биле: Россияның улустуң артизи Игорь Бутман, Алвон Джонсон (гитара, вокал (АКШ), Владимир Толкачев – (саксофончу, Новосибирск), Петр Казимир (труба, Красноярск) болгаш өскелер-биле-даа чаңгыс сценага ойнап турган.
2023 чылда «Тыва Джаз Бэнд» Москвага болган “Триумф Джаза» деп, а ол ышкаш “Енисей кырында джаз” база «Sochi Jazz Festival» фестивальдарга чедиишкинниг киришкен.
А. ХЕРТЕК белеткээн.
“Шын” №48 2024 чылдың июнь 29
