Чаа-Хөлдүң школазы 1980 чылда туттунган. Оон бээр ол школага чаңгыс-даа капиталдыг септелге кылдынмаан. Бо чылын национал төлевилел-биле ам-на септелгени чорудуп эгелээнинге башкылар, өөреникчилер болгаш ада-иелер дыка өөрүп турарлар.
Чаа-Хөл школазының өөредилге эргелекчизи Долаана Комбу:
– Бо чылын национал төлевилел аайы-биле капиталдыг септелге чорудар федералдыг даңзыже кирген 26 школа аразынче бистиң школаның кире бергенинге өөрүп турар бис. Школавыста септелге ажылдары май 1-ден тура эгелээн. Амгы үеде 1-ги, 2-ги каъттарда штукатур-маляр ажылдар болгаш 3-кү каъттың шалазын дескилеп кылыр ажылдар уламчылап турар. Септелгени хүлээникчи организация “Скат” КХН чорудуп турар. Бо хүнде септелге ажылында 35 кижиден тургустунган бригада хаара туттунган. Оларның аразында тус черниң чурттакчыларын киириштиргени өөрүнчүг. Бо капиталдыг септелгеже школаның даштында девискээри кирбейн турар, чүгле школа иштиниң септелгези, соңгаларын солуур болгаш өске-даа ажылдар хамааржыр.
Капиталдыг септелгениң бригадири Таймир Донгак:
– Бо школада капиталдыг септелгени график ёзугаар улуг озалдаашкын чок чорудуп турар бис. Бо хүннерде ниитизи-биле штукатур-маляр ажылдарның 60 ажыг хуузу кылдынган, үш дугаар каътта ол ажылдың 80 хуузу чогуп турар. Бир дугаар каътта чылыдылга системазының дугайында айтырыг шала билдинмейн турары-биле, ында ажылывыс арай оожум чоруп турар. Бир эвес даргалар чылыдылга системазын долузу-биле солуур дээр болза, солуур бис, хевээр арттырар дээр болза, шалазын бо хүннерде доозуптар бис. Бо школаның капиталдыг септелгезин график ёзугаар август айда доозар ужурлуг бис.
Бистиң корр.