Тываныӊ Виктор Көк-оол аттыг национал театрынга Авалар хүнүнге тураскааткан байырлыг хемчег болуп эрткен.
Республиканыӊ кожуун-сумуларындан чалаттырып келген аваларга ТР-ниӊ Чазааныӊ Даргазыныӊ оралакчызыныӊ хүлээлгезин күүседип турар Уран-оол Ондар сөс ап байыр чедирбишаан, Тываныӊ Баштыӊы Владислав Ховалыгныӊ байыр чедирген чагаазын номчуп таныштырган.
«Ие кижиниӊ күш-ажылы эӊ-не хүндүткелдиг. Чуртувустуӊ болгаш республикавыстыӊ келир үези дээш, өг-бүлениӊ ёзу-чаӊчылдарын быжыглаар, Россияныӊ төлептиг хамаатыларын, биче Төрээн чуртуӊарныӊ патриоттарын өстүрүп кижизидер талазы-биле силерниӊ киирип чоруур үлүг-хууӊар үнелеттинмес. Ажы-төлүӊерге кызыгаар чок ынак, мерген угаанныг, быжыг тура-соруктуг үлегериӊерни көргүзүп, оларны амыдыралынга ынак, шупту шаптараазыннарны ажып эртер кылдыр сорук киирип чоруур силер. Ада-чурт камгалакчыларыныӊ, тускай шериг операциязыныӊ киржикчилериниӊ аваларынга, өскүс болгаш ада-иезиниӊ хайгааралы чок арткан чаштарны азырап өстүрүп чоруур аваларга сеткилимниӊ ханызындан өөрүп четтиргенимни илередип тур мен»– деп, Уран-оол Ондар чугаалаан.
Онза хүндүткелдиг ажыл-ишчи аваларга Тыва Республиканыӊ күрүне шаӊналдарын тывыскан.
Өөредилге системазынга хөй чылдар иштинде ак сеткилдиг ажылы дээш ТР-ниӊ Баштыӊыныӊ Өөрүп четтириишкинниг бижиин Кызылдыӊ 12 дугаар ортумак школазыныӊ орус дыл болгаш чогаал башкызы Чодураа Оюнга тывыскан.
ТР-ниӊ Баштыӊыныӊ Хүндүлел бижии-биле "И.Г. Сафьянов аттыг орус культура төвү" күрүне автономнуг албан черинде «Раздолье» орус ырыныӊ улусчу ансамбилиниӊ удуртукчузу Лилия Иванованы, Барыын-Хемчиктиӊ кожууннар аразында эмнелге төвүнүӊ 14 поликлиниказында кардиолог кабинединиӊ эмчи сестразы Вера Ооржакты шаӊнаан.
«Тыва Арат Республиканыӊ ССРЭ-ниӊ составынга эки тура-биле бактаап киргениниӊ 80 чыл ою» медальды «Тываныӊ бедиктериниӊ клуву» республиканыӊ хөй-ниити организациязыныӊ президентизи Марианна Кыргыска тывыскан.
«Тыва Республиканыӊ өөредилгезиниӊ алдарлыг ажылдакчызы» деп хүндүлүг атты Өвүр кожууннуӊ Чаа-Суур ортумак школазыныӊ орус дыл болгаш чогаал башкызы Любовь Кыргыска, «Кызылдыӊ президентиниӊ кадет училищези» федералдыг күрүнениӊ казна өөредилге албан чериниӊ физика, химия, биология эртемнериниӊ башкызы Азияна Зайцевага берген.
Тыва Республиканыӊ В.Көк-оол аттыг Национал хөгжүм-шии театрыныӊ артизи Анзат Кууларны культура болгаш театр уран чүүлүн сайзырадырынга үлүг-хуузун кииргени дээш «Шылгараӊгай күш-ажылы дээш» деп ТР-ниӊ медалы-биле шаӊнаан.
Чедиишкинниг ажылдап чоруур аваларга ТР-ниӊ Дээди Хуралыныӊ (парламентизиниӊ) тускай шаӊналдарын, Өөрүп четтириишкин бижиктерин Дээди Хуралдыӊ Даргазыныӊ оралакчызы Андрей Листков байырлыг ёзу-биле тывыскан.
Авалар хүнүнде республиканыӊ сураглыг артистери, чогаадыкчы коллективтери онза солун концертин бараалгаткан.
ТМГ-ниң медээлеринден.
Чуруктарны интернет четкизинден хоолгалаан.
“Шын” №91 2024 чылдың ноябрь 27
