Ажыл-чорудулгазының угланыышкыны каш янзы «Восток» кызыгаарлаан харыысалгалыг ниитилел Тывада эң күш-шыдалдыг организацияларның бирээзи. Тудуг материалдары бүдүрүп үндүрер заводту ажыглалга киирген ачызында ооң ажыл-чорудулгазы улам делгемчээн. Автомобиль оруктарының болгаш чуртталга бажыңнарының тудуу амгы үеде «Восток» КХН-ниң ажыл-чорудулгазында кол черни ээлеп турар.
Кызыл хоорайның кудумчуларының чаагайжыдылгазынга «Восток» КХН-ниң ажылчыннарының киирген үлүг-хуузу улуг. Олар чылдың-на чайын найысылалдың кудумчуларының оруктарын чаартыр септеп турарлар. Шетинкина-Кравченко биле Чүлдүм кудумчуларының септелгезин ол кудумчуларның белдиринден республиканың малчыннарының улуг байырлалы «Наадым–24-түң» бүдүүзүнде хүннерде «Восток» КХН-ниң механизаторлары болгаш ажылчыннары эгелээн. Кызылдың төвүнге хамааржыр ол девискээрниң септелгезин Наадым байырлалының эгелээринге чедир доозар дээш, олар ажылдап турарлар. Ажылчын оолдарның бирээзи: «Кызыл улам-на аян кирзин дээш, кызып ажылдап тур бис» — деп чугаалады.
Кызылдың кудумчуларында оруктар септелгезин удуртуп турар инженер Эртине Араажының чугаалааны-биле алырга, Чүлдүм кудумчузунуң септелгезин Ленин биле Кызыл партизаннар кудумчуларының аразында ийи кварталга, а Шетинкина-Кравченко кудумчуга септелгени Чүлдүм биле Гагарин кудумчуларының аразында кварталга чорудар. Шетинкина-Кравченко биле Чүлдүм кудумчуларында автомашина оруктарын делгемчидер, чадаг кижилер кылаштаар орукту дең-дески кылдыр септээр. Кыска хуусаада септелге ажылдарын доозарынга четчир машина-техниканы, ажылчыннарны орук септелгезиниң бо участогунда мөөңнээн. Грейдерист Балчий, КамАЗ чолаачызы Владислав Ооржак база өске-даа ажылчыннар септелге ажылдарын дүрген доозар дээш, эртен эртеден орайга чедир кызымак ажылдап турарлар.
Эртине Араажы «Восток» КХН-де элээн үр ажылдап турар аныяк инженер, Кызылга ажылдап кээриниң мурнунда Чадаана тавартыр эрткен Р-257 федералдыг оруктуң тудуунга ажылдап турган.
Ш. КҮЖҮГЕТ.
Авторнуң тырттырган чуруктары.
"Шын" №53 2024 чылдың июль 17
