«Туризм болгаш хүндүлээчел чоруктуң индустриязы» национал база «Турисчи инфраструктураны хөгжүдери» регионалдыг төлевилелдерни боттандырары-биле Тожу кожууннуң Азас хөлүнге пляж зоназын тудар. Турисчи инфраструктураны хөгжүдер сорулга-биле чарлаан мөөрейге Азас хөлдүң эриинге пляж тургузар төлевилелин «Азас» КХН-ниң чиңгине директору Болат Тюлюш киириштирген.
Республиканың туризм адырында «Азас» баазазы 10 чыл ажылдап, бо хүнге чедир бүгү делегейден келген аалчыларын хүлээп келген.
«Азас хөл туристерни хаара тудар бистиң республиканың эң-не онзагай чараш черлериниң бирээзи. «Тожуга келбээн кижи, Тываны көрбээн» деп анаа эвес чугаалаан болгай. Азас хөлдүң эриинде «Азаска ынак мен» деп Сибирьде эң-не улуг чүректиг стеланы тургусканы база кайгамчык» — деп, Болат Тюлюш чугаалаан.
Ук төлевилелди ада-иелерниң, ажы-төлдүң болгаш аныяктарның сонуургалдарын өөренип көрүп тургаш, пляж зоназы тудар деп шиитпирлээн. Аңаа кылаштаар оруктар, дыштаныр, чунар, арыгланыр черлер, мангал, хеме болгаш катамараннар тургузар чер, концерттер болгаш янзы-бүрү мастер-класстар эрттирер шөлчүгештерни тудар.
Пляж зоназы тургузар төлевилел 2023 чылдың декабрь 10-га чедир боттаныр ужурлуг. Бо хүнде тудугнуң белеткел ажылдары чоруп турар.
Тываның Туризм талазы-биле агентилелиниң медээзинден.