Найысылал Кызылдың чурттакчылары болгаш аалчылары чайгы кежээлерде Национал паркта ажылдап турар хоорай пляжынга ажык дээр адаанга кино көөр аргалыг болган. Агаар-бойдусту көрүп тургаш, неделяда 3 катап көргүзүп турар. Ажык дээр адаанга ээлчеглиг кино көрүлдези июль 29-та база болган. Көрүкчүлерге кандыг кино көөрүн шилип алыр эргени берип турар. Дүрүм ёзугаар бир дугаар келген кижи кинону шилиир аргалыг болур.
Ооң мурнунда чылдарда Кызылга мындыг хемчеглер турбаан. Өске улуг хоорайларда ышкаш ажык дээр адаанга кино көрүлдези хүнден хүнче аныяктарны хостуг үезин ажыктыг эрттирери-биле хаара тудуп турар. Пляжта тургускан шезлонгтарга олуруп алгаш, кежээки сериин салгынга өпейлетпишаан, кино көөрге шынап-ла кижиниң мага-боду-даа, сагыш-сеткили-даа дыштаныр.
“Чайгы кежээ кино көөрү дээрге хөй-ле аныяктарның сонуургалын хаара тыртып турар дыштанылганың база бир хевири-дир. Кежээки үеде эш-өөр чыглып келгеш, каткы-хөглүг чугаалашпышаан, кино көөрге кайгамчык-тыр. Аныяктар маңаа келгеш, кандыг кино көөрүн боттары шилип алыры биске кончуг солун болгаш өөрүнчүг-дүр. Кежээки үеде маңаа келгеш, чүгле кино көрүп алыр эвес, чаа-чаа кижилер-биле найыралдажып, хостуг үезин эш-өөр-биле аянныг эрттирип алыр арга-дыр. Хоорайывыс үеден үеже хөгжүп, аныяктарны хаара тудар хемчеглерниң чаа-чаа хевирлери көвүдеп турары өөрүнчүг-дүр” – деп бокска спорт мастери, “Чаңгыс демниг Россия” партиязының кежигүнү Начын Чамбалдоо чугаалаан.
Шак мындыг хемчеглерниң кол сорулгазы кино көрүлдезиниң дузазы-биле кижилерниң эш-өөрүнүң, өг-бүлезиниң кежигүннериниң аразынга хостуг үезин ажыктыг болгаш солун эрттирерин чедип алыры.
Ажык дээр адаанга кино көөр күзелдиглер кандыг кино, кажан болурун Национал парктың ажылдакчыларындан дараазында телефон дугаары дамчыштыр билип ап болур: +7 (39422) 3-60-11.
Чыжыргана СААЯ.
Буян Ооржактың тырттырган чуруктары.
"Шын" №57 2024 чылдың июль 31
