Эрткен дыштаныр хүннерде найысылалда Аныяктар төвүнге массалыг информация чепсектериниң ажылдакчыларынга «RT-регион” медиашколаның өөредилгелери болган.
Аңаа «Медиабөлүк» парлалга бажыңының ажылдакчылары, ол ышкаш тус черниң болгаш күүсекчи эрге-чагырга органнарының парлалга-секретарьлары киришкен.
“RT-Регион” медиашколаның федералдыг эксперттериниң өөредилгезин Тываның Чазааның деткимчези-биле организастаан. Шак-ла мындыг өөредилгелерни 36 хоорайга эрттиргенин "RT-Регион" медиашколаның удуртукчузу Наталья Тованчёва дыңнаткан.
«RT-регион” медиашколаның өөредилгелери ийи чадага эрткен. Бир дугаар өөредилге март айда болган. Ооң кол сорулгазы – массалыг информация чепсектериниң ажылдакчыларының профессионал шынарларын бедидери.
Өөредилгеже массалыг-информация чепсектериниң дуржулгалыг журналистерин чалаан: «Говорит Саров» радионуң кол редактору Роман Алейник, «Русские репортёры» автономнуг коммерциялыг эвес организацияның чиңгине директору Дмитрий Михайлин, «Дорогая Хурма» төлевилелдиң автору Лариса Ржондовская, «АСИ» (стратегтиг бот-идепкейлер агентилели) төлевилелдиң директору Иван Сурвилло. Олар ийи хонук дургузунда республиканың МИЧ төлээлеринге продюсирование дугайында, интервьюну канчаар тургузары, аудиторияны шилиири дээн ышкаш аргаларны билдингир, чедимчелиг тайылбырлап берген. Ол ышкаш медиашколаның оператору Максим Сиротинниң мобильдиг телефонну ажылга ажыглаар аргаларының дугайында видео-кичээлин көргеннер. Лекциялар соонда-ла журналистерниң ажылдарын сайгарып база практиктиг кичээлдерни эрттирген. Лариса Ржондовскаяның кичээлинге киржикчилер бөлүк аайы-биле чарлып алгаш, социал телеграм четкиде каналга каттыжыышкын тургузуп, ооң адын чогааткаш, таныштырылгаларын кылганы дыка солун болган. Интервью алырынга мергежээн журналист Иван Сурвиллонуң кичээлин киржикчилер улуг сонуургал-биле дыңнап, хөй айтырыглар салып, интервью алырының мастер-клазынга база киришкеннер. Ол интервью алыр маадырының чугаазын канчаар үндүрүп алырын, съёмкага канчаар белеткенирин база интервью үезинде бодун канчаар алдынарын тайылбырлап берген.
Ийи чадага эрткен өөредилгелерден республиканың МИЧ-ниң төлээлери дыка хөй ажыктыг чүүлдерни өөренип, билип алганнар. Өөредилгениң киржикчилери удавас доозукчунуң шынзылгаларын холунга алырлар.
Алдынай СОЯН.
Буян Ооржактың тырттырган чуруктары.
«Шын» №20 от 2025 чылдың май 29
