Тыва Республиканың «Күрүнениң юридиктиг бюрозу» (Тыва Республиканың Күрюрбюрозу) 2025 чылдың тос айында ажыл-чорудулгазының дугайында илеткеп, ында халас эрге-хоойлу ачы-дузазы улгатканын база чонну хаара тудары көвүдээнин дыңнаткан. Тыва Республиканың Баштыңы Владислав Ховалыгның шиитпири-биле 2022 чылдың декабрьда тургустунган албан чери республиканың социал деткимчеге хереглелдиг хамаатыларга халас эрге-хоойлу камгалалын хандырар кол рольду ойнап турар.
Күрүнениң юридиктиг бюрозу халас юридиктиг ачы-дуза дугайында федералдыг болгаш регионалдыг хоойлужудулгаларга даянып, эвээш орулгалыг хамаатыларга, I болгаш II бөлүктүң инвалидтеринге, хары угда көөрү болгаш дыңнаары багай III бөлүктүң инвалид кижилеринге, тускай шериг операциязының киржикчилеринге болгаш оларның өг-бүле кежигүннеринге, дайынчы хөделиишкиннер хоочуннарынга, өскүс уругларга болгаш өскелерге-даа ачы-дузаны көргүзер.
Отчёттуг үе дургузунда Күрюрбюро специалистери хамаатыларның 4567 айтырыын сайгарган. Оларның хөй кезии, азы 2752-зи — аас-биле ачы-дуза чедирилгези болган. Оон аңгыда 1081 юридиктиг документини тургускан, оларның аразында 159 билдириишкин, 43 хомудал болгаш 532 удурланыышкын бар.
Күрюрбюро 2025 чылдың тос айында муниципалдыг тургузугларже 44 үнүүшкүннү кылган, аңаа 244 хамааты дузаны алган. Баш бурунгаар киирген чагыглар-биле шимчевес улустуң бажыңнарынче үнүүшкүннерни организастап турар, тос ай иштинде 18 ындыг ажылды чоруткан.
ТР-ниң Чазааның парлалга албанының медээзинден алган.
Чуруктарны Тываның Чазааның парлалга албанындан алган.
“Шын” №46 2025 чылдың ноябрь 27
