Апрель 9-та ТР-ниң Чонну ажылга хаара тудар төвүнге парлалга конференциязы болган. Аңаа ТР-ниң күш-ажыл болгаш социал политика сайыдының бирги оралакчызы Шеңне Лапчаа болгаш ТР-ниң Чонну ажылга хаара тудар төвүнүң директорунуң оралакчызы Нам Дунзунмаа апрель 12-де Бүгү-россия чергелиг хостуг ажыл туруштарының ярмарказын республика девискээринге калбаа-биле эрттирериниң дугайында дыңнаткан.
Бо чылгы ярмарканың өске чылдардан ылгалдыг чүүлү, чарлаттынган Кадыкшыл чылы база Өг-бүле чылынга тураскааткан “Кадык чарыш” деп спортчу хемчег-биле эгелээр деп турар. Аңаа хоорайның күш-ажылчы коллективтеринден чыглып келген 100 ажыг кижилер апрель 12-де 10.00 шакта Аныяктар сесерлиинден чаржып үнгеш, И. Ярыгин аттыг спорт комплекизинге чедир маңнаар.
Ол хүн республиканың бүгү кожууннарынга шак-ла ындыг ярмарка эртери билдингир. Кызыл хоорайга ярмарка ийи шөлге: Аныяктар ордузунга болгаш И. Ярыгин аттыг спорт комплекске эртер. Аныяктар ордузунга ТР-ниң Эртем болгаш өөредилге яамызы, ТР-ниң Аныяктар херектериниң талазы-биле яамы болгаш ТывКУ, “Баштайгыларның шимчээшкини” хөй-ниити организациязы Аныяктар шуулганын организастап эрттирер.
Ярмарканың кол шөлчүгештери И. Ярыгин аттыг спорт комплекске болур. Аңаа 40 ажыг шөлчүгешке ажыл дилекчилеринге консультациялар болгаш өске-даа медээ-тайылбырлыг дуза алырынга эптиг байдалдарны тургузар. Ол ышкаш ТР-ниң Чонну ажылга хаара тудар төвүнүң кол партнёрлары болгаш 50 ажыг улуг организацияларның ажыл берикчилери боттарынга хереглеттинип турар специалистерни ярмарка киржикчилериниң аразындан шилип алырынга белен.
“Эрткен чылын ярмаркаже 11 муң кижини хаара туткан болза, бо чылын 55 муң чедир чонну хаара тудар сорулганы салган бис. Апрель 12-де болур ярмаркага белеткел ажылдарын кылып тура, хостуг ажыл олуттары бар республиканың бүгү албан организациялары, яамыларынга “Работа России” деп порталче медээзин салырын Чонну ажылга хаара тудар төп дыңнаткан. Ынчалдыр апрель 12-де болур ярмаркага киржикчилери 1340 хостуг ажыл туружундан бодунга тааржыр ажылды шилип алыр аргалыг болур. Ярмарка Бүгү-россия чергелиг болганда, республикадан дашкаар регионнар: Ямало-Ненецк автономнуг округ, Сахалин, Рязань, Самара, Кемерово областары, Красноярск край, Кузбасс киржип турар. Бир эвес ажыл дилекчизи ол регионнарның кайы-бирээзинге ажылдаар күзелдиг болза, ярмарка үезинде ол-ла черге онлайн консультацияны эрткеш, бодунуң резюмезин чорудуп болур аргалыг бо-лур” – деп, оралакчы сайыт Шеңне Лапчаа дыңнаткан.
Республика девискээринде эң-не хереглелдиг мергежилдерге эмчилер, башкылар, кижизидикчи башкылар, тудугжулар болгаш орук-тудуг талазы-биле адырга ажылдаар специалистер хамааржып турар. Оон аңгыда “Тываэнерго” – 20, “Лунсин” – 38, “Тывахарылзааинформ” 20 хостуг ажыл олудун ажыл дилекчилеринге сүмелеп турар деп, Нам Дунзунмаа тодаргайлаан.
Бо чылын ТШО киржикчилери болгаш кадыының байдалы кызыгаарлыг арга-шинектиг улусту ажылга тургузар талазы-биле улуг кичээнгейни салып турар. Оларга ярмарка үезинде тускай аңгылаан шөлчүгештер ажылдаар.
Оон аңгыда, апрель 12-де И. Ярыгин аттыг спорт комплекстиң даштынга 60 хире майгынга ТР-ниң Сайгарлыкчы чорукту деткиир фондузу социал керээ езугаар бодунуң хууда ажыл-херээн эгелеп алган сайгарлыкчыларның кылган продукциязының садыг-делгелгезин организастаар. Ярмарка киржикчилери ол-ла садыг-делгелгеден көдээ ажыл-агый продукцияларын садып алыр аргалыг болур.
Ниитизи-биле хостуг ажыл туруштары хөй. 2023 чылда ындыг ярмаркадан 570 кижи ажыл тып алган болза, бо чылын 700 кижини ажылга тургузар сорулга бар. Ажылдаар күзел-ле бар болза, кандыг-даа ажылды ярмарка үезинде тып ап болур дээрзин ТР-ниң күш-ажыл болгаш социал политика сайыдының бирги оралакчызы Шеңне Лапчаа дыңнаткан.
Карина МОНГУШ.
«Шын» №27 2024 чылдың апрель 10
