ТР-ниң Чазааның Даргазының оралакчызы Е. Хардикова республиканың улуг ажыл берикчилери ажылдакчылар санын кызырарын планнавайн турар дээрзин социал күш-ажылчы хамаарылгалар өйлээр талазы-биле ажылчын комиссияның хуралында дыңнатканын чугаалаан.
Республикада ажыл чок чоруктуң санын көвүдедирин болдурбазы-биле, бооп болгу дег чүүлдерни чайладыр даалганы ажылчын комиссия кежигүннеринге сагындырган. Россияның Президентизи Владимир Путин чурттуң күүсекчи эрге-чагырга органнарының мурнунга ындыг даалганы салган.
«Тываэнергосбыт» АН-да, Ажаалга банкызы, Росбанк дээн ышкаш башкарыкчы банкылар кирген банк адырында, кадык камгалал организацияларында, арга-арыг ажыл-агыйларында байдалды аңгы чугаалашкан.
Банкылар төлээлери оларның адырында кызырылда дугайында чугаа чорбайн турарын, харын-даа удуртулга боттарының албан-хаакчыларын үнелеп, оларның өөредилгезинче база ажылга депшилгезинче хөй кичээнгейни салып турарын дыңнаткан.
Тываның Күш-ажыл яамызы күш-ажыл рыногунда байдалды хүн бүрүнүң хыналдазында алган. Ажылдакчыларын кызырар, ажыл-чорудулгазын соксадыр азы түр када тургузар дугайында медээлер кээп турар бүдүрүлгелерже онза кичээнгейни угландырган.
Күш-ажыл керээзин соксадып азы кызырылда кылыр деп турар факт-барымдааларны яамының 8(39422)5-61-95 дугаарлыг “изиг шугум” телефонунче дыңнадып болур.
/ Тываның Чазааның парлалга албаны.