Улусчу фронтунуң регоналдыг салбырында “Бүгү күштү Тиилелгеже” деп акция-биле тускай шериг операциязының киржикчилеринге гуманитарлыг дуза чыылдазы уламчылап турар. Республиканың сагыш-човангыр чурттакчы чону эм-таң, чылыг идик-хеп аймаан, чылыдар херекселдерни, чажыртыннар четкилерни база оон-даа өске чугула херек чүүлдерни дайынчыларже чорудары-биле эккеп турар.
Бо удаа найысылал Кызылда “Московскаяда диш эмчизи” клиниканың төлээлери дайынчыларга херек эм-таң аймаан Улусчу фронтуга чедирген. Клиниканың удуртукчузу Надежда Сарыглар дайынчыларны деткип, улаштыр база дузалажыр сорулгалыг.
Оон аңгыда “Деткимче” регионалдыг фондунуң удуртукчузу Артыш Иргит, Арыг-силиг болгаш эпидемиология төвүнүң улуг эмчиниң хүлээлгезин күүседип турар Чойгана Биче-оол, Красноярск хоорайда чурттап чоруур тывалар чыгдынган ачы-дузазын дамчыдып бергеннер.
Улусчу фронтунуң регионалдыг салбырындан аңгыда, Ленина 5-те база гуманитарлыг дуза чыылдазы чоруп турар. Айтырыглар бар болза дараазында телефон дугаарынче долгапкаш харылзажып болур: 8(39422)2-10-50.
Ада Тюлюштуң тырттырган чуруктары.
