Бо чылын республика Баштыңының Чаа чылдың чаңчылчаан Ёлказы декабрь 24-те В. Көк-оол аттыг национал хөгжүм-шии театрынга болган. Чаа чылдың оюн-тоглаазы ийи аңгы агымга болур: бирээзи 11.00 шакта, а ийигизи 15.00 шакта. Республиканың шупту 19 муниципалдыг тургузугларындан ниитизи-биле бир муң школачы, оларның аразында Тываның күрүне өөредилге албан черлериниң өөреникчилери киришкен.
Бии-Хем кожуундан аңгыда, республиканың шупту кожууннарының өөреникчилери бирги улуг хемчегге киришкен. Бо кожууннуң өөреникчилери Кызылдың болгаш республиканың күрүне өөредилге черлериниң өөреникчилери-биле кады ийиги агымга ужурашкан.
Тываның Баштыңының Ёлказынче өөредилгезинге шылгараан салым-чаяанныг өөреникчилерни, тускай шериг операциязының киржикчилериниң ажы-төлүн, амыдыралдың берге байдалынга таварышкан өг-бүлелерден школачыларны чалаанын сагындыраал. Чаа чыл байырлалының киржикчилерин тус черде тускай комиссиялар чогуур квота санынга шилээн.
Тываның Баштыңының Ёлказын чылдың-на эрттирери республикада чаагай чаңчыл апарган. Чугула болгаш уттундурбас байырлалче бүгү Тывадан чүс-чүс уругларны чалаан. Хемчеглер программазында байырлалдың оюн-көргүзүү, ойнаар шөлдер болгаш чогаадыкчы мөөрейлер хөй болган. Уруглар Соок Ирей биле Харжыгаштан байыр чедириишкиннерин, ол ышкаш республика Баштыңындан чигирзиг белектерни алганнар.
В. Көк-оол аттыг национал хөгжүм-шии театрынга декабрь 25-те 11.00 шакта кадыкшылы кызыгаарлыг 300 уругга Чаа чылдың байырлалы болур.
Декабрь 26-да 11.00 шакта база-ла улуг театрга Тыва Республиканың Дээди Хуралының (парламентизиниң) уругларның Чаа чыл Ёлказы болуп эртер, аңаа 500 уруг киржир. Дүъштекиниң 15.00 шакта Тыва Республикада «Ада-чурт камгалакчылары» күрүне фондузунуң Чаа чыл ёлказы болур, ынаар база 500 оолдар, уругларны чалаан.
А. МОНГУШ.
Чурукту ТР-ниң Чазааның парлалга албанындан алган.
“Шын” №50 2025 чылдың декабрь 25