Аңчыларның 129 бригадазы бөрүлерни аглап, чок кылып, оларның санын өйлеп турар дугайында январь 20-де Аппарат хуралынга Дириг амытаннар камгалалының күрүне комитединиң удуртукчузу Артыш Салчак дыңнаткан.
747 аңчы бөрүлер аглаарынга эргежок чугула 112 автомашина, 20 хар мотошанактары, 109 аът дээш өске-даа дериг-херекселдер болгаш боо-чепсек-биле бүрүнү-биле хандыртынган. Бо чүүл республиканың кожууннарынга бөрүлер азырал дириг амытаннарже халдаан таварылгаларда аглаашкыннарны шалыпкын чорудар арганы тургускан.
2024 чылда ниитизи-биле 382 бөрүнү аглап, чок кылган. Эрткен чылдың декабрь айдан бо чылдың январь 8-ке чедир 59 бөрүнү чок кылган, оларның 38-и эр, а 21-и кыс бөрүлер болган.
Бөрүлерниң санын өйлеп аглаар ажылды ТР-ниң Чазааның 2021 чылдың декабрь 8-те үндүрген доктаалы ёзугаар чорудуп турар.
Бистиң корр.
Чурукту интернет четкизинден хоолгалаан.
“Шын” №2 2025 чылдың январь 23