Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев 2025 чылда Сибирь федералдыг округда онза байдалдарны болдурбас болгаш чайладыр чаңгыс аай күрүне системазының ажыл-чорудалгазының түңнелдерин үндүрген хуралды эрттирген. 2025 чылда 4 муң ажыг кижилерниң амы-тынын камгалааны системаның ажылының кол түңнели болган.
Анатолий Серышев регионалдыг эрге-чагырга органнары-биле чогуур албан черлериниң үре-түңнелдиг кады ажылдажылгазын демдеглээн. Хөй санныг профилактиктиг хемчеглерниң ачызында, Сибирьде чурттакчылыг черлерни болгаш инфраструктура объектилерин улуг суг үеринден чайлаткан, транспорт аргыжылгазын үреп болур айыылга келген чурттакчылыг черлерге бирги хергелелдиң курлавырын үе шаанда тургускан. Арга-арыг өрттериниң хемчээли элээн кызырылган: бо чылын өрт 81 муң гектар хире шөлге болган, беш чылдың ортумак көргүзүүнден дөрт катап эвээш.
Сибирь регионнарынга өрт-биле демисежир хемчеглерни планнап тура, черден болгаш агаардан хайгааралды шынарлыг оргнаизастааны өрт үнген черни үе шаанда илередип, ону чок кылыр арганы берип, үре-түңнелдиг болган деп бүрүн эргелиг төлээ демдеглээн. Федерацияның алды субъектизинде арга-арыгларны өртке удур чепсеглээр хемчеглерниң ортумак көргүзүү 99 хуу болуп, долузу-биле күүсеттинген.
Келир чылда мурнады көөр аңгы-аңгы сорулгаларны болгаш кол угланыышкыннарны база сайгарган. Суг-техниктиг тудугларны ажылчы байдалче киирери, хамаатыларның от-биле оваарымча чок чоруундан үнер арга-арыг өрттерин болдурбазының профилактиктиг тайылбыр ажылдарын организастаары, бойдустуң болгаш техногенниг улуг айыыл-халаптың үнүп болур айыылының дугайында дыңнадыг системазының турум ажылдаарын хандырары – мурнады шиитпирлээр айтырыглар.
Суг объектилеринге озал-ондакты болдурбазын база чугаалашкан. Биче суднолар талазы-биле хамааты инспекцияның волонтерлары болгаш штаттан дашкаар инспекторлары база суг объектилеринде камгалакчы матростар ОБЯ ажылдакчыларынга идепкейлиг дузалажып турарын демдеглээн. Хуралдың киржикчилери сугга айыыл чок алдынарының дугайында тайылбыр ажылын болгаш өөредилгени күштелдирери, мониторингини идепкейлиг чорудары база эштир черлерни камгалал дериг-херекселдер-биле дериири чугула дээрзин демдеглээн.
1990 чылдың декабрь 27-де тургустунган Россияның Онза байдалдар яамызының 35 чылдаан оюнуң бүдүүзүнде, бүгү чуртта юбилейлиг улуг хемчээлдиг хемчеглер, спортчу маргылдаалар эртип, тураскаалдарны, аллеялар болгаш темалыг делгелгелерни ажыдып, маадыр камгалакчыларга тураскаадып оран-саваларны каастап турар. Байырлалдың бир кезээ кылдыр, чурттакчы чоннуң айыыл чок чоруунуң культуразын бедидеринче, аныяктарның кижизидилгезинче болгаш кадык амыдыралды суртаалдаарынче онза кичээнгейни угландырган. Кадеттер шимчээшкини ам-даа немежип турар – чаа класстар ажыттынып, дагдыныкчылар аныяк салгалды өрт-камгалал херээнге өөредип, патриотчу чорукту кижизидип, Төрээн чуртка ынакшылды оттуруп турар.
Анатолий Серышев Россияның хамааты камгалал, онза байдалдар болгаш бойдус халаптарының уржуктарын чайладыр талазы-биле яамының удуртулгазынга, хууда составынга, хамааты специалистеринге, ол ышкаш эки турачы өртчүлерге чиге болгаш демниг ажылы, ылаңгыя кижилерни камгалаарынга хууда эрес-дидим болгаш коргуш чок чоруу дээш четтиргенин илереткен.
Бүрүн эргелиг төлээ шилип алган ажыл-херээнге шынчы албаны, бедик мергежили, онза байдалдарны болдурбас болгаш чайладыр чаңгыс аай күрүне системазының чедиишкинниг ажылдаарын хандырарынга хууда үлүг-хуузу дээш Өөрүп четтириишкин бижиктерин Россияның Онза байдалдар яамызының федералдыг округунуң Новосибирск областа Кол эргелелиниң Кризистиг байдалдарда удуртулга төвүнүң регионалдыг онза байдалдар албанының ажыл-агыйжы удуртулга органнары болгаш территориалдыг иштики системалары-биле кады ажылдажылга килдизиниң начальниги Анастасия Миллер; Россияның Онза байдалдар яамызының Новосибирск областа Кол эргелелиниң хайгаарал болгаш профилактика ажылының талазы-биле эргелелдиң Коченёвский база Чүлымский районнар талазы-биле хайгаарал болгаш профилактика ажылының килдис начальнигиниң оралакчызы Елена Андрианова; Россияның Онза байдалдар яамызының Сибирьниң камгалал төвүнүң медицина албанының начальниги – медицина пунктузунуң начальниги Владимир Наумов; «Россияның Онза байдалдар яамызының Сибирь регионалдыг дилээшкин-камгалал отряды» федералдыг күрүнениң казна албан чериниң регионалдыг дилээшкин-камгалал отрядының начальниги Александр Сайбель оларга тывыскан.
Ооң мурнунда Новосибирск облазының Чазааның бажыңынга бүрүн эргелиг төлээ Россия Федерациязының хамааты камгалал, онза байдалдар болгаш бойдус халаптарының уржуктарын чайладыр талазы-биле сайыттың оралакчызы – статс-секретарь Денис Попов, Новосибирск облазының губернатору Андрей Травников база Россияның Онза байдалдар яамызының Новосибирск область талазы-биле кол эргелелиниң начальниги Виктор Орлов-биле ажыл-агыйжы ужуражылганы эрттирген. Аңаа хамаатыларның айыыл чок чоруун хандырары-биле холбашкан амгы үениң айтырыгларын сайгарып чугаалашкан.