Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Новосибирск облазының Кольцово эртем хоорайында «Сибирьниң долгандырыглыг фотон үндезини» деп коллективтиг ажыглаашкын төвүнүң тудуунга четкен.
Комплекстиң оран-савалары болгаш тудуглары колдуунда адакталган. Инжектор тудуунда, шенелде шөлүнде болгаш дузалал тудугларының көвей кезиинде ажылдар доозулган. «СКИФ» коллективтиг ажыглал төвүнүң ниити тудуглары бо хүнде 95,1 хуу белен. Төптүң тудуунда 1100 ажыг кижи киржип турар.
Анатолий Серышев комплекстиң төп оран-савазы — шыгжамыр цистерназы болгаш шенелде станцияларынче онза кичээнгейни угландырган. Ол тудуглар 90 хуу белен. Дээвиирин болгаш суг дамчыдар шугумнарны, тудугнуң мурнун, витражтарны эптээн, иштики шеверлел ажылдары, агаарладыр, айыыл чок чорук болгаш амыдырал-хандырылга системаларын эптээри уламчылавышаан.
Россияның Эртемнер академиязының Сибирь салбырының ядролуг физика институдунуң директору Павел Логачев бүрүн эргелиг төлээге объектини ажыглалче киирер дээш, эртемденнерге аңгылаан арыг өрээлдерде бедик шынарлыг дериг-херекселдерни эптеп тургузарын дүргедеткен деп дыңнаткан.
Ооң-биле чергелештир шенелде станцияларынче дериг-херекселдерни чедирген. 1-3 дугаар шенелде станциялар 96,4 хуу белен, а бедик энергетикалыг рентген диагностиказынга тургускан 1-5 дугаар шенелде станцияның белени 98 хуу чоокшулаан.
Төптүң шупту техниктиг нарын дериг-херекселдерин Россияга бүдүрген, ооң хөй кезиин Сибирь регионнарындан эртемденнер ажылдап кылганы онза чугула деп бүрүн эргелиг төлээ демдеглээн. «Бо онзагай төлевилел дээш үре-түңнелдиг болгаш демниг ажыл Сибирь эртемденнериниң ат-алдарын көдүрер дээрзинге бүзүрээр мен» — деп, Анатолий Серышев чугаалаан.
Павел Логачев бо теманы уламчылап тура, комплекстиң тудуу Новосибирскиниң Академхоорайжыгажының эртем институттарының чылдар дургузунда чоруткан эртем ажылдары-биле боттанган деп демдеглээн. Ооң чугаазы-биле алырга, тускай эртем-шинчилелдери мурнакчы үлетпүр бүдүрүлгелерин хөгжүдеринге болгаш инновациялыг бүдүрүлгени тургузарынга үндезинни тургузар.
Тудуг үезинде бергедээшкиннер таварышса-даа, төлевилел доозулган дээрзин бүрүн эргелиг төлээ демдеглеп, үре-түңнелдиг кады ажылдажылгазы дээш эртемденнерге болгаш тудугжуларга өөрүп четтиргенин илереткен. «СКИФ» КАТ-тың чедиишкиннери ада-чурттуң эртеминче инвестицияларны салырының чугулазын болгаш эргежогун тодаргай көргүскен. Бистиң сорулгавыс – маңаа, Сибирьге, чоокку 50 чылдарда эртем-шинчилелдерниң таваан салып, эртемниң чедиишкини дээш үре-түңнелдиг ажылдаар арганы бистиң ажы-төлүвүске, уйнуктарывыска бээрин хандырары» — деп, бүрүн эргелиг төлээ чугаалаан.