ТР-ниң Күш-ажыл болгаш социал политика яамызынга Тыва Республикада уругларның Бүгү-российжи бүзүрел телефонунуң психологтары-биле ужуражылга болган.
Специалистер болгаш эксперттер чыглып алгаш, боттарының арга-дуржулгазы-биле үлежип база келир үеде планнарын сайгарып чугаалашкан.
Аңаа чугаалашкан айтырыгларның бирээзи бүзүрел телефонунуң ажыл-чорудулгазы болган. Бүзүрел телефонунда үш шугум бар дээрзин ужуражылганың киржикчилери дыңнаткан. Шугум бүрүзү долгап келген кижиге дээштиг дузалаары-биле тодаргай теманы харыылап турар. Чижээлээрге, долгаарга бирги шугумда чугаалажып турар болза, ала-чайгаар ийиги шугумче шилчи бээр, дараазында үшкүзүнче. Ол долгаашкын үезинде үр манаарын болдурбас болгаш уруг бүрүзүнге оперативтиг деткимчени көргүзерин хандырар.
Бо дээрге психологтуг дуза чедирер талазы-биле ажылын чаа эгелеп чоруур аныяк специалистерге тургускан тускай система-дыр. Ол система аныяк специалистерге дүрген чаңчыгарынга болгаш чедиишкинниг ажылдаарынга эргежок чугула арга-мергежилдер алырынга дузалаар.
2024 чылдың бирги кварталында 2345 кижи долгаан болза, а эрткен чылын — 9720. Бо саннар бүзүрел телефонунуң ажылының херектиин болгаш ажыктыын бадыткап турар. Ол, ылап-ла, кижилерге дузалап турар.
Уругларга, элээдилерге болгаш оларның ада-иелеринге Бүгү-российжи чаңгыс аай бүзүрел телефону: 8-800-200-0122. Бо телефонче долгаары халас болгаш анонимниг.
ТР-ниң Күш-ажыл болгаш социал полититка яамызының медээлеринден.
«Шын» №38 2024 чылдың май 25
