Тываның Баштыңы бодунуң шиитпири-биле чаагайжыдар хөй-ниити шөлдериниң шилиир онлайн-бадылаашкынын организастаар болгаш чорудар ажылчын бөлүктү тургускан. Ынаар республиканың шупту кожууннарының болгаш Ак-Довурак хоорайның чагырга даргалары кирген.
Владислав Ховалыг бөлүктүң удуртукчузу кылдыр Чазак Даргазының оралакчызы Олег Лукинни томуйлаан. Шак ындыг ажылчын бөлүктерни муниципалитеттер деңнелинге тургузар.
Чаагайжыдар хөй-ниити девискээрлериниң шилилдези чылдың-на бүгү чуртта чоруп турарын, ам апрель ортан үезинде эгелээрин сагындыраалыңар. Россияның 14 хардан өрү назылыг чурттакчылары чаагайжыдылга негеттинип турар бодунуң девискээрин саналдап болур. Эң эки саналдарны Бүгү-россия чергелиг бадылаашкынче киирер, а хөй үннү алганнарны «Таарымчалыг хоорай хүрээлелин хевирлээри» федералдыг төлевилел планынче киирер, ол 2025 чылда «Амыдыралдың чаа инфраструктуразы» деп чаа национал төлевилел составынга ажылын уламчылаар.
Эрткен чылдың бадылаашкын түңнелдери-биле, 2025 чылда чаагайжыдар төлевилелдер шилилгезинге Тываның чурттакчыларының саналдааны 86 девискээрден 30 төлевилел эрткен. Федералдыг программа күүселдезиниң бо чылдарында, республикада шупту 145 хөй-ниити шөлдери, ооң иштинде уруглар болгаш спортчу шөлдер, парктар болгаш кудумчулар чаагайжыттынган.
Бистиң корр.
«Шын» №9 2025 чылдың март 13