Республиканың чурттакчылары «Таарымчалыг хоорай хүрээлеңин хевирлээри» федералдыг төлевилелдиң Бүгү-российжи бадылаашкыннарынга кайы хире киржип турарының дугайында эрткен айда бижээн бис. Ында Бай-Тайга, Тере-Хөл база Чөөн-Хемчик кожууннарның чурттакчылары кандыг төлевилелдер дээш бадылап турарын база кайы кожууннар бадылаашкыннарда эки киржип, кайызы идепкей чогун айыткан бис. Ам бадылаашкыннар адакталып турда, ыраккы Мөңгүн-Тайга, Тожу кожууннарда база төп Каа-Хем кожуунда байдалды көрээлиңер.
2026 чылда чаагайжыдар хөй-ниити девискээрлерин шилиир Бүгү-российжи бадылаашкын бо чылдың апрель 21-ден эгелээнин сагындырып каалы.
Тожу кожууннуң чону бо чылын 2 төлевилел дээш бадылап турар. Кожуун төвү Доора-Хемге Ада-чурттуң Улуг дайынының база тускай шериг операциязының киржикчилеринге тураскааткан «Хоочуннар аллеязын» чаагайжыдары база Ий сумуже кирер орукка стела тургузары көрдүнген. Доора-Хемде дайынчылар аллеязы дээш 933 кижи, а Ий сумузунга стела дээш 802 кижи үнүн берген (июнь 2-ниң көргүзүү-биле).
Үш муң ажыг чурттакчылыг Доора-Хемниң чурттакчы чонунуң чүгле үштүң бир кезии бадылаашкынга киришкен болуп турар. А бир муң бичии ажыг ийжилерниң хөй кезии соңгупкан-дыр.
Ам ыраккы Мөңгүн-Тайга кожуунну сонуургаалыңар. Кожуун төвүн чаагайжыдарынга бо чылын 2 төлевилелди киирген. Мугур-Аксында «Алдар аллеязын» чаагайжыдары дээш 1788 кижи бадылаан. 99 кижи Мугур-Аксының Кара-оол Салчак аттыг кудумчузунга спортчу ойнаар шөлчүгеш турзун дээш соңгаан. Бадылаашкынның доостурунга чедир неделя арткан, ынчангаш мөңгүн-тайгажылар ам-даа эки идепкейлиг киржири күзенчиг.
Дараазында төп Каа-Хем кожууннуң чурттакчылары база ийи төлевилел дээш бадылап турар. Мерген суурнуң С.К. Тока кудумчузунда тураскаалды келир чылын чаартып болур. Ол дээш ам бодунда чүгле 2025 кижи соңгаан (июнь 2-ниң көргүзүү).
Көк-Хаактың Культура бажыңының чанынга келир чылын Аныяктар сесерлии турзун дээш 162-ле кижи соңгаан. Аңаа спортчу объектилер турар: дыштаныр черлер, воркаут шөлү, чайганыыштар, дыштаныр сандайлар.
Эң-не хөй үннү – 2138 кижи спортчу объект дээш берген. Бүрен-Бай-Хаактың төп кудумчузунда стадионга ногаан шывыг чадар, маңнаар оруктар, хол бөмбүү, баскетбол ойнаар шөлчүгештерни база аңаа немей кылыр. Бо стадион тус черниң чурттакчыларының спорт-биле өңнүктежир, эң-не хөй чыглыр ынак чери апаар дээрзи билдингир.
Бүгү-российжи бадылаашкыннарның доостурунга чедир неделя арткан. Ынчангаш Тываның чурттакчыларын чурттап турар хоорай-суурларының келир үези база чаагайжыдылгазы дээш ам-даа эки идепкейлиг киржирин кыйгырып тур бис.
Бүгү-российжи бадылаашкынга киржирде, «Госуслуги. Решаем вместе» мобильдиг капсырылга таварыштыр, zagorodsreda.gosuslugi.ru платформага азы хөй-ниити черлеринге волонтёрлар дузазы-биле бадылап болур.
Алдынай СОЯН.
Чуруктарны интернеттен хоолгалаан.
«Шын» №21 2025 чылдың июнь 5
