Кызыл кожууннуӊ Ээрбек сумузунда эът барааннарын кылып бүдүрер бичии цехтиг «Байлак» деп чаа садыг ажыттынган.
«Чурттуӊ экономиказын хөгжүдериниӊ база бир угланыышкыны дээрге биче болгаш ортумак бизнести делгемчидери болур. Ынчангаш сайгарлыкчы ажылды эгелеп алыр күзелдиг улусту деткиӊер. Социал керээниӊ шугуму-биле боттарыныӊ дузалал ажыл-агыйын азы хуу сайгарлыкчы херээн ажыдып ап болур» – деп, Президент Владимир Путин Санкт-Петербург хоорайга болуп турган Делегейниӊ экономиктиг шуулганынга чугаалаан.
Социал керээ – амыдыраар акша-хөреӊгизи эвээш өг-бүлелерге, хамаатыларга дузалаар сорулгалыг күрүне программазы. Социал керээ беш аӊгы хевирлиг болур. Ажыл тып алырынга дузалаар, кандыг-бир мергежил өөренип алыр, дузалал ажыл-агыйын кылыр, хуу сайгарлыкчы ажылды эгелээр, өг-бүлезиниӊ материалдыг байдалын экижидер талазы-биле күрүнениӊ дөмек-дузазын көргүзер.
Ниити республикада болгаш кожууннарда бо ажылды Чонну ажылга хаара тудар төп уштап-баштап турар.
Кызыл кожууннуӊ Чонну ажылга хаара тудар төвү Ээрбек сумузунда чурттап турар Байлак Алексеевич биле Байлак Андреевна Кырларныӊ өг-бүлезинге социал керээ чарып алырын сүмелээн. Олар керээ ёзугаар эът барааннарын болбаазырадыр бичии цех ажыдып алган. Аӊаа бүдүрген барааннарын боттарыныӊ садыынга садып-саарар. Чаӊгыс чер чурттугларын аъш-чем-биле хандырар садыыныӊ адын база «Байлак» деп адап алганнар.
Төрээн суурунга бичии бүдүрүлгелиг садыгныӊ немежип келгенинге Ээрбектиӊ чурттакчылары өөрүп турар. Дидим болгаш шиитпирлиг базымны кылган сайгарлыкчы өг-бүлеге чедиишкинниг ажылдаарын йөрээп күзээннер.
Р. ДЕМЧИК
«Шын» №68 2023 чылдың сентябрь 13