Хүндүлүг малчыннарывыс, көдээ ишчилеривис болгаш чаңгыс чер чурттугларым!
Хүннүң алдын-сарыг херелдерин бир дугаар уткуур, эртенги салгынны бир дугаар хөрек долдур тынар эрес-кежээ, ажыл-ишчи малчыннарывыс ынак байырлалы– республика Наадымын таварыштыр силерге Тыва Республиканың Дээди Хуралының (парламентизиниң) өмүнээзинден байыр чедирерин чөпшээреп көрүңер!
Бо чылгы Наадым байырлалын республиканың хөй нация чону омак сергек, өөрүшкү-маңнайлыг уткуп турар. Көдээ ажыл-агый адыры, ооң иштинде мал ажылы чылдан чылче улам сайзырап, бедик көргүзүглерни чедип албышаан. Олут орбас малчыннарывысты, ниити мал ажылын деткээн күрүне төлевилелдери болгаш программалар республикада ажылдап турар. Оларны хөй көдээ ишчилер чөптүг ажыглап, оларга киржип турарындан болбаазырадылганың улуг-биче бүдүрүлгелери ында-мында черлерде ажыттынып турары онзагай. Ынчангаш күш-ажылчы көргүзүглер чылдан чылче экижип орар. Ол бүгү чедиишкиннерниң артында ажыл-ишчи арат чонувус турар.
Наадым–2024 Тываның Россияның составынга эки тура-биле каттыжып киргениниң 80 чыл оюнуң бүдүүзүнде эртип турар болгаш, чоннуң сагыш-сеткили амыр-тайбың, хей-аъды болгаш сүлдези бедик байдалда. Бо чараш байырлалдар бедик деңнелге эртер дээрзинге чигзиниг чок.
Силерге онза чараш национал байырлал Наадым таварыштыр кадыкшылды, аас-кежикти болгаш төрээн Тывавыстың хөгжүлдези дээш кылып чоруур бүгү-ле буянныг ажылдарыңарга чедиишкиннерни күзедим!
ТР-ниң Дээди Хуралының (парламентизиниң) Даргазы К. ДАВАА.
"Шын" №53 2024 чылдың июль 17
