Байыр чедириишкини

Хүндүлүг чаңгыс чер чурттугларым!

Үнүп олурар чаа 2025 чыл-биле Силерге ТР-ниң Дээди Хуралының (парламентизиниң) мурнундан байыр чедирерин чөпшээреп көрүңер.
2024 чыл – чуртта Өг-бүле чылы кылдыр эртип турар. Ону деткиир хөй ажыл республикада кылдынган болгаш моон-даа соңгаар кылдынар. Россияның Президентизи В.В. Путин Тываны демография талазы-биле эки ийи регионнуң бирээзи деп санап турары онзагай.

Дооступ турар чыл республикага Кадыкшылга чылы кылдыр чарлаттынган.Чоннуң кадыкшылын быжыглаар талазы-биле база хөй ажылдар кылдынган. Черле ынчаш, 2024 чыл Тывага ниити хөгжүлде чылы болган: экономиктиг, культурлуг болгаш спортчу чедиишкиннер каракка көскү. Хоорайларда, сумуларда чаа-чаа тудуг объектилери, автооруктар, көвүрүглер, кыштаглар дээш өске-даа чүүлдер туттунуп, ажыглалче кирип турар. Социал төлевилелдер чоннуң деткимчезин алган. Олар бисти өөртүп, хей-аът киирип каттыштырган. Кандыг-даа ажылды демнежип тургаш, кылыптар чон бис деп чүвеге бүзүреливис быжыккан.

Сөөлгү чылдарда чедип алганывыс хөгжүлде бисте ам-даа бурунгаар чүткүл, кызымак чорук бар-дыр деп чүвени херечилеп турар. Дээди Хурал Тываның Баштыңы болгаш Чазаа, өске-даа хөй-ниити организациялары-биле демнежип тургаш, депшилгелиг ажыл-чорудулганы үнер чылда уламчылаар. Республиканың шалыпкын темп-биле сайзыралынга бүгү деңнелдерниң эрге-чагыргаларының чаңгыс аай хөделиишкиннери улуг идиг болуп турар.

2025 чылда Тываның чурттакчы чонунуң амыдыралы улам экижиир дээрзинге бүзүреливис улуг. Ол өг-бүле, кижи бүрүзүнге тодуг-догаа болгаш амыр-тайбың амыдыралды сөңнээр болзун, уттундурбас болуушкуннар-биле элбек, бурунгаар депшилгениң чылы болзун деп йөрээр бис. Оран-чуртувуска амыр-тайбың турумчуп, доктаазын. Тускай шериг операция улуг өндүр чуртувус Тиилелгези-биле доостур болзун!
Силерге, чаңгыс чер чурттугларымга, 2025 чылда аас-кежикти, кадыкшылды база күзээн күзелдериңер ыяап-ла бүдерин Дээди Хуралдың мурнундан күзедим!

ТР-ниң Дээди Хуралының (парламентизиниң) Даргазы К. Даваа.
«Шын» №100 2024 чылдың декабрь 28